„ბიძიად ვთვლიდი, ერთად ვცხოვრობდით, იცოდა, რომ საყვარელი მამაკაციც მყავდა…“ – უთხრა მოსამართლეს დაზარალებულად ცნობილმა ქალმა სალომემ [სახელები შეცვლილია] გაუპატიურების საქმეზე, რომელიც ბათუმის საქალაქო სასამართლოში მოსამართლე გიორგი გრატიაშვილმა განიხილა.
დაზარალებულისგან განსხვავებით, ბრალდებული კაცი ირწმუნებოდა, რომ მან ქალს მხოლოდ სცემა სიტყვიერი დაპირისპირების შემდეგ და გაუპატიურებას ადგილი არ ჰქონდა. ამ ორი პირის გარდა ჩვენება სასამართლოს მხოლოდ ბრალდებულის დისშვილმა მისცა, რომელმაც თქვა, რომ კონფლიქტის დროს ადგილზე არ ყოფილა, მაგრამ ხაზი იმას გაუსვა, რომ „ისინი ერთად ცხოვრობდნენ“.
დაზარალებული ქალის თქმით, მან ბრალდებული ვახტანგი ბათუმში 2019 წელს გაიცნო, როგორც ნათესავი და შემდეგ ერთად ცხოვრებაზე შეთანხმდნენ. ისინი რამდენიმე თვე ხელვაჩაურში ცხოვრობდნენ.
„მე მივიჩნევდი ბიძიად, რომელმაც შემიფარა, დედა უცხოეთში იყო და იქედან გვიგზავნიდა ფულს… პერიოდულად ვახტანგიც გადადიოდა თურქეთში სამუშაოდ… ჩვენ ერთმანეთთან ცოლქმრული ურთიერთობა არ გვქონდა, არც ინტიმური კავშირი. ჩვენ ვიყოფდით საცხოვრებელ სახლს, როგორც ნათესავები.
4 დეკემბერს ორივემ ერთად ვივახშმეთ, ცოტა დავლიეთ და დასაძინებლად დავწექით… მე ჩვეულებისამებრ მისაღებში დავწექი, ის – თავის ოთახში, მაგრამ ის მალე მობრუნდა უკან, ჩამოჯდა ჩემს საწოლზე და ფერება დამიწყო. მითხრა, რომ ვუყვარდი, რომ მხოლოდ მისი ვიქნებოდი. ავუხსენი, რომ საყვარელი მამაკაცი მყავდა და თვითონაც კარგად იცოდა ამის შესახებ, არაერთხელ იყო ის ჩემთან მოსული, მაგრამ არ მომისმინა, ხელში ამიყვანა უცებ და იატაკზე დამაგდო…“ – უთხრა სალომემ მოსამართლეს.
ქალის თქმით, ის ვახტანგმა ცემის შემდეგ გააუპატიურა და მან სახლი მაშინვე დატოვა, როგორც კი კაცი აბაზანაში გავიდა.
„გზაში დამეწია, მეხვეწებოდა, რომ არ მეთქვა პოლიციისთვის, მე არაფერს ვპასუხობდი. პოლიციის განყოფილებაში მივედი პირდაპირ,“ – დაასრულა ქალმა.
„სასამართლო ვერ გაიზიარებს ბრალდებულის ჩვენებას და ადვოკატის მოსაზრებას იმასთან დაკავშირებით, რომ ბრალდებულს გაუპატიურება არ ჩაუდენია და მან მხოლოდ სცემა დაზარალებულს, რადგან არ გამომდინარეობს საქმის ფაქტობრივი გარემოებებიდან. ბრალდებულს სურს თავიდან აიცილოს პასუხისმგებლობა და უფრო მსუბუქი დანაშაულის ცემის აღიარებით დააჯეროს სასამართლო მის გულწრფელობაში და წარმოაჩინოს ისე თითქოს, რაც ჩაიდინა, აღიარებს და ინანიებს კიდეც.
დაზარალებულის ჩვენება ასევე დადასტურდა მასზე არსებული დაზიანებებით. ჩატარებული სასამართლო სამედიცინო ექსპერტიზის დასკვნით, ქალის ორგანიზმში აღმოჩენილია ვ——– ვ—-––ის სპერმის ნიმუში. დაზარალებულის დაკითხვისთანავე მისგან ამოღებული დაზიანებული – დახეული საცვალით,“ – წერს განაჩენში მოსამართლე გიორგი გრატიაშვილი.
ბათუმის საქალაქო სასამართლომ ვახტანგს 7 წლით მიუსაჯა თავისუფლების აღკვეთა.
