Batumelebi | პეტერბურგში კულტურული მემკვიდრეობის ძეგლი იწვის პეტერბურგში კულტურული მემკვიდრეობის ძეგლი იწვის – Batumelebi
RU | GE  

პეტერბურგში კულტურული მემკვიდრეობის ძეგლი იწვის

პეტერბურგში, ოქტომბრის სანაპიროზე მდებარე „ნევის მანუფაქტურის“ შენობაში ძლიერი ხანძარია. რუსეთის საგანგებო სიტუაციების სამინისტროს ინფორმაციით, კვამლი 10 ათას კვადრატულ მეტრზე ვრცელდება. ინფორმაციას სააგენტო BBC ავრცელებს.

აგურის ექვსსართულიან, ცეცხლმოკიდებულ შენობაში ადამიანების დახმარების დროს დაზარალდნენ მეხანძრეები. ორი მეხანძრე ჰოსპიტალშია გადაყვანილი, ერთი კი დაიღუპა.

რუსული მედია წერს, რომ უეცარი აალების შემდეგ ძლიერი ხანძარი გაჩნდა სწორედ იმ დროს, როცა გაზისა და ცეცხლისგან დამცავი ნიღბებით მეხანძრეებს ადამიანები შენობიდან გამოჰყავდათ.

РИА Новости-ს ცნობით ჰოსპიტალში გადაყვანილი დაზარალებული მეხანძრეების მდგომარეობა მძიმეა.

„ნევის მანუფაქტურა“ – მატყლის პროდუქტების მწარმოებელი ქარხანაა, რომელიც 1841 წელს დააარსა ინგლისელმა ვაჭარმა ჯეიმს ტორნტონმა. ამ ქარხნების შენობები რეგიონული მნიშვნელობის კულტურული მემკვიდრეობის ძეგლების სიაშია შეტანილი.

ხანძარს სიმძიმის მიხედვით სპეციალისტებმა მე-5, უმაღლესი კატეგორია მიანიჭეს.

შენობის ჭერის დიდი ნაწილი ჩამოინგრა, ხანძრის სალიკვიდაციო სამუშაოებისას სახანძრო ვერტმფრენების გამოყენება გახდა აუცილებელი.

მედიის ცნობით, ხანძარი ჯერ ლოკალიზებული არ არის. თვითმხილველები კი ამბობენ, რომ ხანძარი ძლიერდება და მთელი შენობა მოიცვა.


მთავარ ფოტოზე: სქრინი გამოცემა “Фонтанка”-ს ვიდეოდან.

მასალაში გამოყენებულია თვითმხილველთა ტვიტერზე დაპოსტილი ფოტოები.

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com