Batumelebi | მკაცრ რეაგირებას მოვახდენთ სამართალდარღვევის ნებისმიერ ფაქტზე – შსს მკაცრ რეაგირებას მოვახდენთ სამართალდარღვევის ნებისმიერ ფაქტზე – შსს – Batumelebi
RU | GE  

მკაცრ რეაგირებას მოვახდენთ სამართალდარღვევის ნებისმიერ ფაქტზე – შსს

ნამოხვანისკენ მიმავალ გზაზე, სოფელ გუმათში, აქციის მონაწილეებსა და პოლიციას შორის დაპირისპირების შემდეგ შინაგან საქმეთა სამინისტრო განცხადებას ავრცელებს.

სამინისტროს ინფორმაციით, სხვადასხვა დანაყოფის თანამშრომლები, უსაფრთხოებისა და მართლწესრიგის დაცვის მიზნით, რიონის ხეობაში არიან მობილიზებულები.

შს სამინისტრო აცხადებს, რომ უსაფრთხოების მიზნით, რიონის ხეობაში მოქალაქეთა გადაადგილება გარკვეულ მიმართულებებზე დროებით იზღუდება პოლიციის შესახებ საქართველოს კანონის 25-ე და 26-ე მუხლების შესაბამისად.

„შინაგან საქმეთა სამინისტრო არ დაუშვებს რიონის ხეობაში პროტესტი ძალადობრივი სცენარით განვითარდეს და მკაცრ რეაგირებას მოახდენს სამართალდარღვევის ნებისმიერ ფაქტზე,“ – ნათქვამია სამინისტროს განცხადებაში.

პოლიცია მოუწოდებს მოქალაქეებს, არ გასცდნენ გამოხატვის თავისუფლების კანონით დასაშვებ ფარგლებს და დაემორჩილონ პოლიციის მოთხოვნებს.

რამდენიმე წუთის წინ აქციის მონაწილეებმა რიონის ხეობისკენ მიმავალი გზის გახსნა მოითხოვეს, რომელიც საპოლიციო ძალების მიერაა გადაკეტილი. ხელებაწეულმა აქტივისტებმა პოლიციის კორდონის გარღვევა სცადეს.

რამდენიმეწუთიანი დაძაბულობის შემდეგ საპროტესტო მოძრაობის ერთ-ერთმა ლიდერმა ვარლამ გოლეთიანმა აქტივისტებს უკან მშვიდობიანი დახევისკენ მოუწოდა, რის შემდეგაც დაპირისპირება რიონის ხეობაში განიმუხტა.

_______________________

ფოტოზე: „რიონის ხეობის მცველი“ მაკა სულაძე პოლიციელებს მიმართავს. ფოტო: „ბათუმელები“/მანანა ქველიაშვილი

ნეტგაზეთის მასალების სხვა გამოცემებში გადაბეჭდვის წესი
ავტორი