Batumelebi | 11 სკოლა დახურულია, ინფიცირებული მოსწავლეების რიცხვს არ ასახელებენ – კოვიდი აჭარაში 11 სკოლა დახურულია, ინფიცირებული მოსწავლეების რიცხვს არ ასახელებენ – კოვიდი აჭარაში – Batumelebi
RU | GE  

11 სკოლა დახურულია, ინფიცირებული მოსწავლეების რიცხვს არ ასახელებენ – კოვიდი აჭარაში

აჭარის საზოგადოებრივი ჯანდაცვის ცენტრის ინფორმაციით, დღეს, 12 აპრილის მდგომარეობით, აჭარაში 11 საჯარო სკოლაა დახურული.

„ბათუმელების“ კითხვას, აჭარაში რამდენი მოსწავლეა ამ დროისთვის კოვიდით ინფიცირებული, აჭარის საზოგადოებრივი ჯანდაცვის ცენტრი არ პასუხობს. ცენტრში გვითხრეს, რომ ინფიცირებულთა რაოდენობის შესახებ მხოლოდ თვეში ერთხელ გააჟღერებენ ინფორმაციას და დაასახელებენ მხოლოდ პროცენტულ მაჩვენებელს.

აჭარის საზოგადოებრივი ჯანდაცვის ცენტრის ინფორმაციით, დღეს საკლასო ოთახში სწავლებას ბათუმის მე-14 საჯარო სკოლა დაუბრუნდა:

„ხვალიდან ლეღვას პირველი საჯარო სკოლა დაუბრუნდება და კვირის განმავლობაში იგეგმება კიდევ სხვა სკოლების გახსნაც. დღეს დაიხურა ორი საბავშვო ბაღი, ხვალიდან კი ფუნქციონირებას განაახლებს ქობულეთის ერთი ბაღი,“ – განაცხადა დღეს, 12 აპრილს, აჭარის საზოგადოებრივი ჯანდაცვის ცენტრის დირექტორის მოადგილემ, ნონა ეფაძემ.

მისივე ინფორმაციით, ამ დროისთვის აჭარაში ონლაინსწავლებაზეა 14 კლასი.

ნონა ეფაძის თქმით, სკოლებსა და ბაღებში წერტილოვანი შეზღუდვები უკავშირდება გამოვლენილ შემთხვევათა რაოდენობას და ვირუსის გავრცელების პრევენციას.

რაც შეეხება კორონავირუსის მესამე ტალღას, როგორც ნონა ეფაძე ამბობს, აჭარაში შემთხვევათა მატება გვაქვს:

„ეს არ არის მკვეთრი მატება და ჯერჯერობით ამ შემთხვევებს ვერ დავარქმევთ მესამე ტალღას, თუმცა ძალიან საყურადღებოა და მნიშვნელოვანია რეკომენდაციების დაცვა და გადაწყვეტილებებიც ეპიდსიტუაციის მიხედვით იქნება მიღებული,“ – ამბობს ნონა ეფაძე.

ოფიციალური მონაცემებით, დღეს აჭარაში კორონავირუსის 46 ახალი შემთხვევა დადასტურდა.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com