ბათუმის №2 საჯარო სკოლა ორშაბათიდან, 12 აპრილიდან, ორი კვირით გადადის დისტანციურ სწავლებაზე.
№2 სკოლის დირექტორი, მარიზა აბაშიძე ამბობს, გადაწყვეტილება აჭარის განათლების და ჯანდაცვის სამინისტროების რეკომენდაციით იქნა მიღებული და მიზეზი კორონავირუსის პრევენციაა.
„სკოლაში 2 000 მოსწავლეა და სკოლაში გვაქვს სულ 9 შემთხვევა. თითქოს პატარა ციფრია, მაგრამ პრევენციის მიზნით, ჯანდაცვისა და განათლების სამინისტროს რეკომენდაციით მიღებული იქნა ეს გადაწყვეტილება.
აღნიშნული კორონავირუსის 9 შემთხვევა არის მოსწავლეებს შორის.
რაც შეეხება მასწავლებლებს, ორი დღის წინ ჩატარდა პედაგოგებისა და თანამშრომლების გეგმიური ტესტირება და ყველა, 125-ვე ტესტი იყო უარყოფითი კოვიდზე, ანუ სკოლაში პედაგოგებს და სკოლის პერსონალს კოვიდი არ დადასტურებია“ – ამბობს მარიზა აბაშიძე „ბათუმელებთან“.
ბათუმის №2 სკოლა შენობაში სწავლებას 26 აპრილს განაახლებს.