ბათუმელი პოლიციელების წინააღმდეგ გამოძიება დაიწყო – „სირცხვილიას“ წევრების დაკავების საქმე

ბათუმში მოძრაობა „სირცხვილიას“ ოფისში 3 აპრილის ღამეს პოლიციელების შესვლის და აქტივისტების დაკავების საქმეზე პოლიციელების წინააღმდეგ გამოძიება დაიწყო.

სახელმწიფო ინსპექტორის სამსახურის ინფორმაციით, „დაიწყო გამოძიება სისხლის სამართლის საქმეზე, 2021 წლის 3 აპრილს ბათუმში, მოძრაობა სირცხვილიას ოფისთან, საპროტესტო შეკრების მონაწილეთა მიმართ, შინაგან საქმეთა სამინისტროს ცალკეული თანამშრომლების მხრიდან განხორციელებული სამსახურებრივი უფლებამოსილების ძალადობით გადამეტების ფაქტზე, საქართველოს სისხლის სამართლის კოდექსის 333-ე მუხლის მე-3 ნაწილის „ბ“ ქვეპუნქტით გათვალისწინებული დანაშაულის ნიშნებით საქმეზე ინტენსიურ რეჟიმში ტარდება საგამოძიებო და საპროცესო მოქმედებები ეფექტიანი და სრულყოფილი გამოძიების უზრუნველყოფის მიზნით“.

ამის შესახებ „ბათუმელებს“ სახელმწიფო ინსპექტორის სამსახურის პრესცენტრიდან აცნობეს.

„სირცხვილიას“ ოფისში პოლიციელები შაბათს ღამით მას შემდეგ შევიდნენ, როცა აქტივისტებმა საპროტესტო აქციით კომენდანტის საათი გააპროტესტეს. აქტივისტების თქმით, პოლიციელებს არ განუმარტავთ, რის საფუძველზე შევიდნენ „სირცხვილიას“ ოფისში ან რის გამო დააკავეს და სცემეს ადამიანებს.

როგორც წესი, მსგავს შემთხვევებში გამოძიება იწყება. გამოძიება დაიწყო, მაგალითად, ბათუმში კომენდანტის საათის დროს პოლიციელების მხრიდან მოქალაქის ცემის ფაქტზე. ეს 2020 წლის 4 აპრილის ამბავია. ზუსტად ერთი წელი გავიდა ამ შემთხვევიდან და სახელმწიფო ინსპექტორის სამსახურს გამოძიება ჯერ არ დაუსრულებია.

რაც შეეხება „სირცხვილიას“ აქტივისტებს, მათ ხულიგნობას და პოლიციელის კანონიერი მოთხოვნის დაუმორჩილებლობას ედავებიან. გადაწყვეტილებას დღეს, 5 აპრილს, მიიღებს ბათუმის საქალაქო სასამართლო.