Batumelebi | რატომ აჭიანურებს უმაღლესი საბჭო ოპოზიციისთვის უფლებამოსილების შეწყვეტას რატომ აჭიანურებს უმაღლესი საბჭო ოპოზიციისთვის უფლებამოსილების შეწყვეტას – Batumelebi
RU | GE  

რატომ აჭიანურებს უმაღლესი საბჭო ოპოზიციისთვის უფლებამოსილების შეწყვეტას

აჭარის უმაღლესი საბჭო ისევ არ განიხილავს ოპოზიციისთვის დეპუტატის უფლებამოსილების შეწყვეტის საკითხს. უმაღლესი საბჭო ხვალ, 18 მარტს, პლენარულ სხდომას გამართავს, თუმცა დღის წესრიგში ისევ არ არის ოპოზიციონერი დეპუტატების საქმე.

2020 წლის 21 დეკემბერს, არჩევნების შემდეგ,  ექვსმა დეპუტატმა უფლებამოსილების შეწყვეტის მოთხოვნით უმაღლეს საბჭოს მიმართა, მოთხოვნა საბჭოს ამ დრომდე არ განუხილავს. უფლებამოსილების შეწყვეტა „გაერთიანებული ოპოზიციის“ პროპორციული სიით გასულმა დეპუტატებმა ითხოვეს ირაკლი ჩავლეიშვილის გარდა, რომელიც უმაღლეს საბჭოში შევიდა.

„24 მარტი არის ამ საკითხის განხილვის ბოლო ვადა,“ – გვითხრეს აჭარის უმაღლესი საბჭოს პრესცენტრში, სადაც ვიკითხეთ, რატომ არ განიხილავს უმაღლესი საბჭო ოპოზიციისთვის უფლებამოსილების შეწყვეტის საკითხს.

პრესცენტრში განმარტეს, რომ „კომიტეტზე განხილვის გარეშე ვერ მოხდება კენჭისყრა სესიაზე, კომიტეტს კი დრო აქვს ჯერ“.

18 მარტის სხდომაზე კი, უმაღლესი საბჭო 2020 წლის 31 ოქტომბრის არჩევნების შესახებ ანგარიშს მოისმენს. მომხსენებელი პარმენ ჯალაღონიაა, უსკოს თავმჯდომარე.

ხვალ იქნება მინისტრის საათიც – დეპუტატები ჯანდაცვის მინისტრს, ნინო ნიჟარაძეს მოუსმენენ.

ოპოზიციამ უფლებამოსილების შეწყვეტა ითხოვა პარლამენტშიც. იქ უმრავლესობამ ოპოზიციისთვის უფლებამოსილების შეწყვეტაზე უარი თქვა, რაც, მაგალითად, დეპუტატებმა თამარ კორძაიამ და ზურაბ გირჩი ჯაფარიძემ საკონსტიტუციო სასამართლოში გაასაჩივრეს. ამ დროისთვის ოპოზიციიდან პარლამენტში მუშაობენ „მოქალაქეები“ [2 წევრი] და „ევროპელი სოციალისტები“ [4 წევრი].

ნეტგაზეთის მასალების სხვა გამოცემებში გადაბეჭდვის წესი
ავტორი