Batumelebi | „ბათუმელები“ აცხადებს კონკურსს მედიასკოლაში ახალგაზრდების მისაღებად „ბათუმელები“ აცხადებს კონკურსს მედიასკოლაში ახალგაზრდების მისაღებად – Batumelebi
RU | GE  

„ბათუმელები“ აცხადებს კონკურსს მედიასკოლაში ახალგაზრდების მისაღებად

გაზეთი „ბათუმელები“ აცხადებს კონკურსს ახალგაზრდებისთვის მედიასკოლის პროგრამაში მონაწილეობის მისაღებად.

„ბათუმელების“ მედიასკოლის მსმენელები სამი თვის განმავლობაში გაივლიან ინტენსიურ, თეორიულ და პრაქტიკულ კურსს ჟურნალისტიკაში.

მედიასკოლის მონაწილეები ისწავლიან ახალი ამბებისა და ვიდეო/ფოტომასალის მომზადებას, ინტერვიუს ჩაწერას, ციფრული მედიის სპეციფიკას, მედიაწიგნიერების ისეთ საკითხებს, როგორიცაა ყალბი ინფორმაციის იდენტიფიცირება და ა.შ.

პროგრამის მონაწილეები თავად მოამზადებენ ჟურნალისტურ მასალებს ტრენერების დახმარებით. მათ მიერ მომზადებული ნამუშევრები გამოქვეყნდება „ბათუმელების“ ვებგვერდზე batumelebi.ge.

მედიასკოლის სასწავლო კურსის დასრულების შემდეგ მსმენელები მიიღებენ სერტიფიკატს. 2 მონაწილე შეირჩევა „ბათუმელებში“ სამთვიანი, ანაზღაურებადი სტაჟირებისთვის.

მედიასკოლაში სწავლა უფასოა.

კონკურსის პირობები:

  • კონკურსში მონაწილეობა შეუძლიათ 18-დან 24 წლამდე ახალგაზრდებს
  • კონკურსის მონაწილე უნდა ფლობდეს კომპიუტერთან მუშაობის უნარ-ჩვევებს (ბეჭდვა, ელ.ფოსტა, სოციალური ქსელები)
  • უნდა შეეძლოს გამართულად წერა

კონკურსში მონაწილეობისთვის გამოგზავნეთ CV და მოკლე სამოტივაციო წერილი (რატომ გინდათ მონაწილეობა პროგრამაში) ელექტრონულ ფოსტაზე stajiori.batumelebi@gmail.com. სათაურში (subject) ქართული შრიფტით. მიუთითეთ: მედიასკოლა და თქვენი სახელი და გვარი [მაგალითად: მედიასკოლა – ანა ბერიძე].

თუ გაქვთ მომზადებული სტატია, თხზულება, ფოტორეპორტაჟი, პოსტი ან მოსაზრება, შეგიძლიათ გამოგზავნოთ CV-თან ერთად.

კონკურსში განცხადებების მიღების ბოლო ვადაა 26 მარტი.

„ბათუმელები“ თავად დაუკავშირდება შერჩეულ კანდიდატებს. გასაუბრების საფუძველზე შეირჩევა მედიასკოლის მონაწილე 15 ახალგაზრდა.

სწავლება „ბათუმელების“ მედიასკოლაში გაიმართება კვირაში სამჯერ. მედიასკოლის ტრენერები იქნებიან გაზეთ „ბათუმელების“ ჟურნალისტები. სწავლება 3 თვის განმავლობაში გაგრძელდება.

პროგრამა მედიასკოლა ხორციელდება „თავისუფალ ჟურნალისტთა სახლის“ პროექტის ფარგლებში – „დემოკრატიული იდეების და ღირებულებების პოპულარიზაცია აჭარაში“. პროგრამას ფინანსურად მხარს უჭერს ამერიკული ორგანიზაცია „ეროვნული წვლილი დემოკრატიისთვის“ (NED).

_______________

ფოტოზე: „ბათუმელების“ ნიუსრუმი

  

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.