იმ ქვეყნების ჩამონათვალს, რომელთა მოქალაქეებსაც საჰაერო გზით საქართველოში შემოსვლა PCR ტესტის საფუძველზე შეუძლიათ, შუა აზიის 4 რესპუბლიკა – უზბეკეთი, ტაჯიკეთი, ყირგიზეთი და თურქმენეთი დაემატა.
შესაბამისი განკარგულება საქართველოს მთავრობამ 2021 წლის 5 მარტს მიიღო. მანამდე, პირველ მარტს კი, ამ ჩამონათვალს 6 ქვეყანა დაემატა – სომხეთი, აზერბაიჯანი, უკრაინა, ყაზახეთი, რუსეთი, ბელარუსი.
შესაბამისად, დღევანდელი მდგომარეობით, საქართველოში PCR ტესტის საფუძველზე საჰაერო გზით შემოსვლა შეუძლიათ:
ევროკავშირის წევრი სახელმწიფოების, ისრაელის, თურქეთის, შვეიცარიის, ნორვეგიის, აშშ-ის, დიდი ბრიტანეთისა და ჩრდილოეთ ირლანდიის გაერთიანებული სამეფოს, საუდის არაბეთის, კატარის, არაბთა გაერთიანებული საამიროების, ბაჰრეინის, სომხეთის, აზერბაიჯანის, უკრაინის, ყაზახეთის, უზბეკეთის, ტაჯიკეთის, ყირგიზეთის, თურქმენეთის, რუსეთისა და ბელარუსის მოქალაქეებსა და ამავე ქვეყნების ბინადრობის (ცხოვრების) უფლების მქონე პირებს, რომლებიც საქართველოში მოემგზავრებიან ამავე ქვეყნებიდან (მათ შორის, ტრანზიტული მგზავრობისათვის მესამე ქვეყნების გამოყენების შემთხვევაშიც).
ამ ქვეყნების მოქალაქეებს საქართველოში შემოსვლის უფლება აქვთ ბოლო 72 საათში გაკეთებული PCR ტესტის ნეგატიური პასუხის საფუძველზე, ხოლო შემოსვლის შემდეგ მესამე დღეს საკუთარი ხარჯით უნდა ჩაიტარონ PCR ტესტი [გარდა იმ შემთხვევისა, როდესაც ამ პირებს აქვთ უკანასკნელი 14 დღის განმავლობაში დიდი ბრიტანეთისა და ჩრდილოეთ ირლანდიის გაერთიანებულ სამეფოში მოგზაურობის ისტორია და ექვემდებარებიან 12 დღით საკარანტინე სივრცეში გადასვლას].
სხვა დანარჩენი ქვეყნების მოქალაქეები ქვეყანაში სავალდებულო თვითიზოლაციის პირობით დაიშვებიან.
2021 წლის პირველი თებერვლიდან საქართველოში საჰაერო გზით შემოსვლა შეუძლია ასევე „ნებისმიერი ქვეყნიდან ნებისმიერი ქვეყნის მოქალაქეს, რომელიც წარადგენს ნებისმიერი ტიპის კოვიდვაქცინის სრული კურსის ჩატარების (ორი დოზა) დამადასტურებელ დოკუმენტს“.
უცხო ქვეყნის მოქალაქეებისთვის საქართველოს სახმელეთო საზღვარი კვლავ ჩაკეტილია.
—
თურქეთში საქართველოს საელჩოს ცნობით, თურქეთის ტერიტორიაზე შემომავალი უცხო ქვეყნების მოქალაქეების მიერ ბოლო 72 საათის განმავლობაში გაკეთებული PCR ტესტის უარყოფითი პასუხის დამადასტურებელი ცნობის წარდგენის ვალდებულება 2021 წლის 15 აპრილამდე გრძელდება.
თურქეთში დროებით დასაქმების მსურველებს ხელახალი რეგისტრაცია შეუძლიათ
