ბათუმი,მთავარი,მთიანი აჭარა,სიახლეები

ფერმერთა დაფინანსების პროგრამისთვის აჭარის სამინისტრო ლეპტოპებს იყიდის

07.03.2021 • 1279
ფერმერთა დაფინანსების პროგრამისთვის აჭარის სამინისტრო ლეპტოპებს იყიდის

„სასოფლო-სამეურნეო გაერთიანებებისა და საოჯახო მეურნეობების განვითარების ხელშეწყობის“ ქვეპროგრამის ფარგლებში, აჭარის სოფლის მეურნეობის სამინისტრო, კოორდინატორებისთვის 6 ცალ ლეპტოპს იყიდის. ტექნიკის შესაძენად სამინისტრო ჯამში 8 844 ლარის გადახდას გეგმავს.

სამინისტროს ინფორმაციით, „წარმოდგენილი განაცხადებისა და თანდართული დოკუმენტაციის, ქვეპროგრამის მოთხოვნებთან შესაბამისობის შესწავლისა და პროექტის განხორციელების ადგილზე მონიტორინგს უზრუნველყოფენ პროგრამების მართვის დეპარტამენტი და ხელშეკრულების საფუძველზე დასაქმებული პირები [კოორდინატორები], რომლებიც გადანაწილდებიან შესაბამის მუნიციპალიტეტებში და რომლებიც ზემოაღნიშნული ფუნქცია-მოვალეობის შესრულებას დაიწყებენ 2021 წლის მარტის თვიდან“.

კომპიუტერული მოწყობილობებისა და აქსესუარების შესყიდვა ხორციელდება კონსოლიდირებული ტენდერების საშუალებით, თუმცა ტენდერი დღეის მდგომარეობით არ არის გამოცხადებული, ამიტომ სამინისტრო გეგმავს ლეპტოპები პირდაპირი წესით შეისყიდოს, რის თაობაზეც შესყიდვების სააგენტოს უკვე მიმართა.

იურიდიულ და კერძო პირებს, რომლებსაც აჭარის მუნიციპალიტეტებში [ბათუმის გარდა] გააჩნიათ მიწის ნაკვეთები საკუთრებაში, ან იჯარით აქვთ აღებული, შეუძლიათ დაფინანსება მოითხოვონ და შესაბამისი პროექტი/განაცხადი სამინისტროში წარადგინონ.

სამინისტრო, პროგრამის ფარგლებში, საკონკურსო კომისიის მიერ შერჩეული პროექტების ღირებულების 80%-ს დააფინანსებს. პროგრამის ბიუჯეტი ჯამში 982 ათას 342 ლარია. აქედან უშუალოდ ბენეფიციართა პროექტების დასაფინანსებლად 907 ათას 342 ლარია გათვალისწინებული.

პროგრამის განაცხადის მიხედვით, შესაძლებელია 151 პროექტის დაფინანსება [თითოეული, საშუალოდ 6 ათასი ლარით].

ქვეპროგრამით შესაძლებელია დაფინანსდეს სასოფლო-სამეურნეო ტექნიკის, სათბურების, ნერგების შეძენა და სხვა ღონისძიებები.

განაცხადების [პროექტების] წარდგენის ბოლო ვადა 2021 წლის 10 მარტია, თუმცა სამინისტროში „ბათუმელებს“ უთხრეს, რომ ეს ვადა მარტის ბოლომდე გადაიწევს.

დაფინანსების მისაღებად დეტალური ინფორმაცია და განაცხადის ფორმა ნახეთ აქ

როგორ შევავსოთ განაცხადი – ამ საკითხზე სამინისტროს განმარტება კი, იხილეთ ბმულზე:

როგორ შევავსოთ განაცხადი სოფლად დაფინანსების მისაღებად – სამინისტროს განმარტება

გადაბეჭდვის წესი


ასევე: