ქობულეთში, სოფელ ქაქუთში 14 წლის გოგოს სავარაუდო სუიციდის შემთხვევამ დაადასტურა სახელმწიფო ზრუნვისა და სოციალური სამსახურების არაეფექტურობა. ტრაგიკულმა შემთხვევამ კიდევ ერთხელ აჩვენა სისუსტეები და პრობლემები, რომლებსაც სახელმწიფო თავს ვერ ართმევს ბავშვებთან და მოზარდებთან მიმართებაში. ქობულეთის შემთხვევაში კი პრობლემაა ისიც, რომ მაგალითად, მხოლოდ ერთი სოციალური მუშაკი ემსახურება მუნიციპალიტეტს და მას ერთდროულად 80 ბავშვთან უწევს მუშაობა.
„ბათუმელები“ დიდი ხანია ცდილობს სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოსგან მიიღოს კონკრეტული პასუხები კითხვებზე, რის გამოსწორებას აპირებენ ამ მიმართულებით სისტემაში. იგეგმება თუ არა, მაგალითად, ქობულეთის მუნიციპალიტეტში, თუნდაც სოციალური მუშაკების დამატება.
ჩვენს კითხვებზე პასუხი უწყებიდან დაგვიანებით და წერილობით გაგვცეს, სადაც ვკითხულობთ, რომ სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს ჩამოყალიბების შემდეგ, 2020 წლის 1 თებერვლიდან არაერთხელ გამოცხადდა კონკურსი სპეციალისტების, მათ შორის სოციალური მუშაკების შერჩევის მიზნით. „აჭარის რეგიონულ ცენტრში, მათ შორის ქობულეთში, ჯამში 10 ვაკანტური პოზიციაა“, – გვწერენ სააგენტოდან.
თუ რატომ დარჩა ადგილები ვაკანტური, სააგენტოში გვეუბნებიან, რომ კონკურსანტების კვალიფიკაცია არ შეესაბამებოდა მოთხოვნებს, რადგან 2020 წლიდან საქართველოს კანონი „სოციალური მუშაობის შესახებ“ სოციალურ მუშაკებს აკადემიური ხარისხის ქონას ავალდებულებს.
თუმცა, უწყებიდან გამოგზავნილ წერილში არაფერი წერია სოცმუშაკებისთვის ანაზღაურების მომატებასა თუ სხვა სერვისებზე, მაგალითად, ტრანსპორტის გამოყოფაზე.
„დასაქმებულ სოციალურ მუშაკებს უნდა ჰქონდეთ აკადემიური ხარისხი სოციალურ მუშაობაში ან გავლილი ჰქონდეთ სოციალური მუშაობის სერტიფიცირების კურსი. სააგენტოში ამ ეტაპზეც მიმდინარეობს კონკურსი. ახალი კადრებისთვის დაგეგმილია კვალიფიკაციის ამაღლების ტრენინგები და სერტიფიცირება. მას შემდეგ, რაც კადრების შევსება მოხდება ასევე დაგეგმილია საკადრო რესურსის ზრდაც,“ – გვწერენ სახელმწიფო ზრუნვის სააგენტოდან.
აქვე ვკითხულობთ, რომ – „სააგენტოში დასაქმებული სოციალური მუშაობის გაუმჯობესების მიზნით დაგეგმილია და ხორციელდება შემდეგი აქტივობები:
მიმდინარეობს არსებული რეაგირების ფორმების გადახედვა, აქტიურად ვმუშაობთ სუპერვიზიის მექანიზმის გაუმჯობესებაზე.
დაგეგმილია კადრების გადამზადება.
თბილისში დაიწყო სპეციალიზაციის პილოტირების პროცესი, რომელიც გულისხმობს სოციალური მუშაობის მიმართულებებით დაყოფას, მაგალითად ბავშვთა დაცვა, შშმ პირები და ასე შემდეგ, ეს თავისთავად გააუმჯობესებს მიწოდებულ ხარისხს. პილოტის დასრულების შემდგომ აღნიშნული მოდელი საქართველოს დიდ თვითმმართველ ქალაქებში დაინერგება.
მიმდინარეობს აქტიური მუშაობა პერსონალის მართვისა და სამუშაო დატვირთვის ეფექტური მექანიზმის გასაუმჯობესებლად. ასევე დაგეგმილია სხვა ღონისძიება, როგორიც არის სპეციალიზირებული მოდულების და რისკის მაიდენტიფიცირებელი დოკუმენტების შექმნა, რომელიც ასევე მნიშვნელოვან გავლენას იქონიებს მუშაობის ხარისხზე“.
სააგენტოში გვეუბნებიან, რომ ბავშვზე ზრუნვის სერვისის გაუმჯობესების მიზნით დაგეგმილია ე.წ „ბარნაჰაუსის“ მოდელის შექმნა, სადაც სექსუალური ძალადობის მსხვერპლ ბავშვებს შესთავაზებენ მულტისექტორულ ინტეგრირებულ მომსახურებას. სააგენტოში გვეუბნებიან, რომ აღნიშნული რეფორმა გასულ წელს დაიწყო, თუმცა როდის ამოქმედდება ეს სერვისი, აქ ზუსტი პასუხი არ აქვთ.
უწყების მიერ გამოგზავნილ წერილობით კომენტარში ვკითხულობთ: „ე.წ „ბარნაჰაუსი“ არის შვედური მოდელი, რომლის მახასიათებლები გულისხმობს ბავშვზე მორგებულ გარემოს შექმნას. როდესაც ბავშვი არის ძალადობის მსხვერპლი ან მოწმე, საჭიროა საქმეში ინტერდისციპლინური გუნდი ჩაერთოს, რომელიც აერთიანებს სპეციალურად გადამზადებულ გამომძიებელს, სოციალურ მუშაკს, ფსიქოლოგსა და სამედიცინო სფეროს წარმომადგენლებს.
შენობა აღჭურვილი უნდა იყოს როგორც საგამოძიებო ინტერვიურებისთვის განკუთვნილი ოთახებით, ასევე პედიატრიული კაბინეტით და სათამაშო და ფსიქოლოგიური კონსულტაციისთვის განკუთვნილი სივრცეებით, რადგან სექსუალური ძალადობის მსხვერპლ ბავშვებს ხშირად უწევთ სხვადასხვა უწყებაში სიარული და არაერთი შეფასების პროცედურის გავლა, რაც თავის მხრივ დამატებით სტრესს წარმოადგენს მათთვის. სწორედ ამ სტრესის შემსუბუქებაში ეხმარება ბავშვებს „ბარნაჰუსის“ მოდელი“.
