Batumelebi | 7.6 წელი მიუსაჯეს 14 წლის ნინიზე სექსუალურად მოძალადეს – ქობულეთში დაღუპული გოგოს საქმე 7.6 წელი მიუსაჯეს 14 წლის ნინიზე სექსუალურად მოძალადეს – ქობულეთში დაღუპული გოგოს საქმე – Batumelebi
RU | GE  

7.6 წელი მიუსაჯეს 14 წლის ნინიზე სექსუალურად მოძალადეს – ქობულეთში დაღუპული გოგოს საქმე

მოსამართლე თამარ ბეჟანიშვილმა 7 წლით და 6 თვით თავისუფლების აღკვეთა შეუფარდა ნიკა ტაკიძეს „14 წლის ნინის საქმეზე“.

14 წლის ნინი ცეცხლაძის დაღუპვის შემდეგ დააკავეს ნიკა ტაკიძე და ნინის ბაბუა – სულიკო ცეცხლაძე მიუხედავად იმისა, რომ მოზარდს ამ შემთხვევამდე ორი თვით ადრე ჰქონდა სექსუალური ძალადობის შესახებ პოლიციისთვის ჩვენება მიცემული.

მოსამართლემ 24 წლის ბრალდებული გაამართლა თვითმკვლელობამდე მიყვანის მუხლით წარდგენილ ბრალდებაში. დამნაშავედ კი მიიჩნია სისხლის სამართლის კოდექსის 140-ე მუხლის პირველ ნაწილში, რაც გულისხმობს „სრულწლოვნის სექსუალური ხასიათის შეღწევას დამნაშავისათვის წინასწარი შეცნობით 16 წლის ასაკს მიუღწევლის სხეულში“.

ეს მუხლი სასჯელის სახით მხოლოდ თავისუფლების აღკვეთას ითვალისწინებს 7-დან 9 წლამდე. მსჯავრდებული 24 წლისაა.

განაჩენი მოსამართლე თამარ ბეჟანიშვილმა 2 ნოემბერს მიიღო.

ნიკა ტაკიძის მამის, იაშა ტაკიძის თქმით, ბათუმის საქალაქო სასამართლოს გადაწყვეტილებას ქუთაისის სააპელაციო სასამართლოში გაასაჩივრებენ.

ამავე მოსამართლემ გამოუტანა განაჩენი ნინის ბაბუას – სულიკო ცეცხლაძეს 6 აგვისტოს შეუფარდეს ერთი წლით თავისუფლების აღკვეთა ოჯახში ძალადობისთვის. ის მუქარის ნაწილში გამართლდა.

2021 წლის 10 თებერვალს ნინი ცეცხლაძემ სიცოცხლე თვითმკვლელობით დაასრულა. ნინი 14 წლის იყო. მაშინ სოფელში ყველა, მათ შორის პედაგოგები აცხადებდნენ, რომ ნინისთვის უცნაური ქცევა, მოწყენილობა არ შეუმჩნევიათ.

„ცამეტიწლინახევრის იყო მაშინ. ემუქრებოდა თუ რა იყო, არ ვიცი, ბავშვი არ ამბობდა რამეს… ჩვენ გავიგეთ მაშინ, მეორეჯერ რომ მოაკითხა, ექვსი თვის მერე“, – უთხრა მედიას მაშინ გარდაცვლილი ბავშვის ბაბუამ.

„ნინის გამო“ – ამ ლოზუნგით გაიმართა „1000 მშობლის მარშიც“. აქციის მოთხოვნები იყო:

  • შეიცვალოს სისხლის სამართლის კოდექსში გაუპატიურების მუხლი, რითიც თანხმობის არარსებობა გახდება ცენტრალური ამოსავალი;
  • შეიქმნას პროკურატურაში სპეციალიზებული დეპარტამენტი, რომელიც სექსუალური ძალადობის საქმეებს ეფექტიანად გამოიძიებს;
  • გახდეს სქესობრივი განათლება ფორმალური განათლების ნაწილი, რითიც ბავშვები შეძლებენ სქესობრივი ძალადობის ამოცნობას და მისგან თავის დაცვას;
  • გაიზარდოს ფსიქოლოგების და სოცმუშაკების რაოდენობა;
  • დადგეს ნინის საქმის პროკურორის პასუხისმგებლობის საკითხი სამსახურებრივი გულგრილობის გამო.

___

სუიციდი არ არის გამოსავალი! გირჩევთ:

როგორ უნდა ამოვიცნოთ სუიციდის ნიშნები

ნეტგაზეთის მასალების სხვა გამოცემებში გადაბეჭდვის წესი
ავტორი