საქართველოს ფინანსთა სამინისტროს საგამოძიებო სამსახურის ინფორმაციით, საბაჟო საზღვარზე დიდი ოდენობით საქონლის გადაადგილების წესის დარღვევის ფაქტი გამოვლინდა, რის გამოც ერთი მოქალაქე დააკავეს.
„გამოძიებით დადგინდა, რომ ბრალდებულმა გერმანიაში შეძენილი მსუბუქი ავტომანქანის სალონში სპეციალურად მოწყობილ სამალავებში განათავსა სხვადასხვა სახის საქონელი, მათ შორის, ძვირადღირებული საათები, ტყავის ნაწარმი, ბიჟუტერია და სხვ.
დანაშაულში მხილებულმა პირმა, უკანონო მატერიალური სარგებლის მიღების მიზნით, ავტომანქანა ბათუმის პორტის გავლით შემოიყვანა საქართველოში და არ დაადეკლარირა მასში არსებული საქონელი“.
საგამოძიებო სამსახურის განცხადებით, ავტომანქანაში აღმოჩენილი საათების საბაჟო ღირებულება 11 745 ლარია. „ხოლო დანარჩენ საქონელზე დანიშნულია ექსპერტიზა“.
გამოძიება მიმდინარეობს სსკ-ის 214-ე მუხლის პირველი ნაწილით, რაც სასჯელის სახით ითვალისწინებს თავისუფლების აღკვეთას 3-დან 5 წლამდე ვადით.
