ანზორ ლაზიშვილი აჭარის ჭიდაობის ფედერაციის პრეზიდენტი პროტესტის ფონზე გახდა

ანზორ ლაზიშვილი მიიჩნევს, რომ მისი კონკურენტი მევლუდ წულუკიძე „ნათესაური მხარდაჭერით მოქმედებს“.

„387 ათასი ლარია ჩემ დროს გამოყოფილი და მთლიანად მათ მოიხმარეს. პირადად მოზიდული მაქვს 72 ათასი ლარი სახელმწიფო სტრუქტურებიდან და 82 ათას ლარზე მეტი ჩემი ინიციატივით. ყველგან ვეხმარებოდი… უმადურობამ ანგელოზი ეშმაკად აქცია“, – უთხრა „ბათუმელებს“ ანზორ ლაზიშვილმა.

უკმაყოფილო სპორტსმენებს შორის არის მსოფლიოს ჩემპიონი რამაზ ზოიძე, რომელმაც განაცხადა, რომ იმ შემთხვევაში, თუ ისევ ანზორ ლაზიშვილი იქნება ფედერაციის პრეზიდენტი, ისინი აჭარის სახელით აღარ იასპარეზებენ. იგივე განაცხადა კიდევ ერთმა ჩემპიონმა შმაგი ბოლქვაძემაც.

მსოფლიოს ჩემპიონები – რამაზ ზოიძე და შმაგი ბოლქვაძე

„ჩვენი კანდიდატი წარვადგინეთ. დაახლოებით 8 წელი იყო ლაზიშვილი ფედერაციის პრეზიდენტი. უკმაყოფილო ვართ ბიჭები. გვინდოდა, რომ ცვლილებები მომხდარიყო, უკეთესობისკენ წავსულიყავით, მაგრამ არ გვაძლევენ ამის შანსს. ამის გამო ავდგებით და აჭარის სახელით აღარ მივიღებთ მონაწილეობას… ჩვენი სიტყვა არ გაითვალისწინეს“.

სპორტსმენების თქმით, დაახლოებით 200 მოჭიდავე დატოვებს აჭარის ჭიდაობის ფედერაციას.

___

მთავარი ფოტო: ანზორ ლაზიშვილი

დაძაბულობა აჭარის ჭიდაობის ფედერაციის პრეზიდენტის არჩევნებზე