პირველი თებერვლიდან საქართველოში შემოსვლის წესი იცვლება როგორც საქართველოს, ისე უცხო ქვეყნის მოქალაქეებისთვის. ამის შესახებ დღეს, 29 იანვარს საქართველოს ეკონომიკის მინისტრმა, ნათია თურნავამ განაცხადა.
მინისტრის განცხადებით, საქართველოს მოქალაქეებს ექნებათ არჩევანის უფლება:
- მათ შეუძლიათ საქართველოში შემოვიდნენ PCR ტესტის ნეგატიური პასუხით;
- გაიარონ 8-დღიანი თვითიზოლაცია;
- თვითიზოლაციის ნაცვლად შემოსვლიდან მესამე დღეს ჩაიტარონ კიდევ ერთი PCR ტესტი.
რაც შეეხება უცხო ქვეყნის მოქალაქეებს, მინისტრის განცხადებით, ნებისმიერი ტიპის კოვიდვაქცინის სრული კურსის ჩატარების, ორი სრული დოზის დამადასტურებული დოკუმენტის საზღვარზე წარდგენის შემთხვევაში საქართველოში შემოსვლა შეეძლება ყველა ქვეყნის მოქალაქეს.
„რაც შეეხება არავაქცინირებულ უცხო ქვეყნის მოქალაქეებს, ევროკავშირის, ისრაელის, შვეიცარიის, აშშ-ის, საუდის არაბეთის, არაბთა გაერთიანებული საემიროების, ბაჰრეინის მოქალაქეებს და რეზიდენტებს ამავე ქვეყნებიდან და, ასევე, ტრანზიტულად ვინც შემოდის საქართველოში, მათ ექნებათ შესაძლებლობა ქვეყანაში შემოვიდნენ ბოლო 72 საათის განმავლობაში PCR ტესტის ნეგატიური პასუხით და ქვეყანაში შემოსვლის მესამე დღეს სავალდებულოდ ჩაიტარონ PCR ტესტი. თვითიზოლაციის ვალდებულებას ვაუქმებთ“ – განაცხადა ნათია თურნავამ.
ეკონომიკის მინისტრმა ასევე განაცხადა, რომ მიმართავენ ავიაკომპანიებს, თვითმფრინავის ბორტზე არ დაუშვან უცხო ქვეყნის ის მოქალაქეები, რომელთაც არ ექნებათ ბოლო 72 საათის განმავლობაში ჩატარებული PCR ტესტის დამადასტურებული პასუხი ან ვაქცინაციის დამადასტურებული დოკუმენტი.
