Batumelebi | როგორ გაანათებენ ბათუმის ცენტრალურ პარკს, რისთვისაც 789 ათასი ლარი დაიხარჯება როგორ გაანათებენ ბათუმის ცენტრალურ პარკს, რისთვისაც 789 ათასი ლარი დაიხარჯება – Batumelebi
RU | GE  

როგორ გაანათებენ ბათუმის ცენტრალურ პარკს, რისთვისაც 789 ათასი ლარი დაიხარჯება

ბათუმის ცენტრალურ პარკში გარეგანათების მოწყობისთვის ქალაქის ბიუჯეტიდან ამჯერად 789 809 ლარია გამოყოფილი. წინა ტენდერი, რომელიც 250 137 ლარით იყო გამოცხადებული, კომისიამ შეწყვიტა. ოქმში ამის მიზეზად მითითებულია, რომ იცვლებოდა პარკის განათების გეგმა.

ახალი ტენდერის დოკუმენტების მიხედვით, ცენტრალურ პარკში დამატებით ნეონის განათება მოეწყობა – ნეონის მანათობელ ლენტებს ბილიკების გასწვრივ დაამომტაჟებენ. ტბის გარშემო მოეწყობა ასევე დეკორატიული სანათები.

ნეონის განათება ბათუმის ცენტრალურ პარკში / ფოტომონტაჟი პროექტიდან

ახალ ტენდერში წინადადებების მიღება დაწყებულია და 2021 წლის 20 იანვარს დასრულდება.

პირობის მიხედვით, „ტენდერში მონაწილე პრეტენდენტს 2018 წლის 1-ლი იანვრიდან ტენდერის გამოცხადების დღემდე [30.12.2020] შესრულებული უნდა ჰქონდეს ტენდერით გათვალისწინებული ანალოგიური ხასიათის, სირთულის და შინაარსის (განათების ქსელებისა და დეკორატიული გარე განთების (ნეონის მანათობელი ლენტით) მოწყობის სამუშაოები) საერთო ღირებულებით არანაკლებ 650 000 ლარის ოდენობით. მათ შორის პრეტენდენტს აღნიშნული პერიოდის განმავლობაში განხორცილებული უნდა ჰქონდეს არანაკლებ ერთი პროექტი დეკორეტიული გარე განათების (ნეონის მანათობელი ლეტით) მოწყობის სამუშაოების“.

განათება პარკში, ტენდერში გამარჯვებულთან ხელშეკრულების გაფორმებიდან 100 დღეში უნდა მოეწყოს.

—–

წინა ტენდერში, რომელიც 2020 წლის პირველ ოქტომბერს დასრულდა, გარეგანათების სამუშაოებს მერიის კეთილმოწყობის სამმართველოს შპს „ჯი თი ჯი“ 250 137 ლარად სთავაზობდა. ანუ ზუსტად იმ ფასს, რაც ტენდერის საწყისი ფასი იყო, თუმცა, როგორც აღვნიშნეთ, სატენდერო კომისიამ ეს ტენდერი იმავე წლის 12 ოქტომბერს შეწყვიტა.

ამ თემაზე:

ცენტრალური პარკის განათებისთვის ბათუმის ბიუჯეტიდან 250 ათასი ლარი დაიხარჯება

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com