ბათუმის ცენტრალური პარკი ბოლო რამდენიმე თვეა ჩაბნელებულია. პარკის გარეგანათების მოწყობაზე მერიის საქალაქო ინფრასტრუქტურისა და კეთილმოწყობის სამმართველომ ტენდერი 9 სექტემბერს გამოაცხადა. სამუშაოებისთვის ქალაქის ბიუჯეტიდან 250 137 ლარია გამოყოფილი. ტენდერში წინადადებების მიღება კი, 1-ელ ოქტომბერს დასრულდება.
გარეგანათების მოწყობა პარკში ტენდერში გამარჯვებულთან ხელშეკრულების გაფორმებიდან 2020 წლის 15 დეკემბრის ჩათვლით პერიოდში უნდა დასრულდეს.
პირობის მიხედვით, „ყველა მასალა, მოწყობილობა, საკომპლექტო ნაწილი, სამარაგო საგანი, მოწოდებული კონტრაქტის ფარგლებში, უნდა იყოს ახალი, უხმარი, სტანდარტული, მაღალი ხარისხის, საუკეთესო დონეზე დაპროექტებული და დამზადებული. უხარისხო ან დაბალი ხარისხის მასალები, მოწყობილობები და საკომპლექტო ნაწილები არ მიიღება და მათი გამოყენება არ იქნება ნებადართული“.
ელექტროგანათების ლითონის ბოძებზე საგარანტიო ვადა კი უნდა იყოს: ლითონის მდგრადობაზე – 5 წელი; მანათობელ მოწყობილობებზე – 3 წელი.
ბათუმის ცენტრალური პარკი / 22.09.2020 /ფოტო: გურამ მურვანიძე
