„მიუხედავად სტაბილიზაციისა, შეზღუდვების ფონზე კლების დინამიკისა, დამშვიდების არავითარი საფუძველი არ არის. ამიტომ, გთხოვთ ყველას, მოსახლეობას, რომ ეს შობა-ახალი წელი გადავიტანოთ განსხვავებულად.
არ გვინდა დიდი თავშეყრები, არ გვინდა დიდი დღესასწაულები, არ გვინდა ხალხმრავალი წვეულებები, ვიყოთ წელს ბევრად მოკრძალებული, იმიტომ, რომ საქმე გვაქვს სერიოზულ გამოწვევასთან, პანდემიასთან,“ – განაცხადა დღეს, 16 დეკემბერს, საკოორდინაციო საბჭოს სხდომის შემდეგ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ.
გამყრელიძის თქმით, თუ მოსახლეობა ამ რეკომენდაციებს არ გაითვალისწინებს, შესაძლოა ვირუსის შემთხვევის კლების ტენდენცია წყალში ჩაიყაროს.
„თუ 24 დეკემბერს დაიწყო შეზღუდვების შემსუბუქება, მაგრამ იგივე მოხდა, რაც შავ პარასკევს იყო, შეიძლება ამან ახალ წელს ისევ მოგვცეს შემდგომი პიკები და ისევ დამძიმდეს მდგომარეობა საავადმყოფოებში. ამიტომ ახალი წლის მოკრძალებული აღნიშვნა იქნება ეკონომიკის სწრაფი აღდგენის და ნორმალური ცხოვრების დაბრუნების საფუძველი,“ – თქვა გამყრელიძემ.
