დღეს დილიდან ვრცელდება ინფორმაცია, საქართველოს პრემიერ-მინისტრის ირაკლი ღარიბაშვილის თანამდებობიდან შესაძლო გადადგომის შესახებ.
საგანგებო ბრიფინგი დღეს 18:00 საათზე უნდა გამართულიყო, თუმცა მოგვიანებით გავრცელდა ინფორმაცია რომ ბრიფინგი 20:00 საათზე გაიმართება.
რამდენად რეალურია და რას უკავშირდება პრემიერის შესაძლო გადადგომის შესახებ გავრცელებული ინფორმაცია? „ბათუმელებთან“ ამ საკითხზე კომენტარს პარლამენტის ვიცე-სპიკერი მურმან დუმბაძე აკეთებს.
„შესაძლო არა, ჩათვალეთ რომ პრემიერი გადამდგარია. მე დარწმუნებული ვარ, რომ რვა საათზე ის გადადგომის შესახებ გააკეთებს განცხადებას. მიზეზი უნდა ჰკითხოთ ყოფილ პრემიერს, რადგან მიმაჩნია რომ საქართველოში დღეს ხელისუფლებას მართავს ბიძინა ივანიშვილი.
როცა ბევრი ნაკლი გაქვს და საკუთარი შრომა არ არის ჩადებული ხელისუფლებაში, ასეთი მოულოდნელობები მაშინ არის დამახასიათებელი“.
