ნეტგაზეთი • RU

დისკუსია საბავშვო ბაღების რეფორმაზე, ბაღების თანამშრომლების გარეშე

რატომ არ ესწრებოდნენ საბავშვო ბაღების ხელმძღვანელები და პედაგოგები „ადრეული და სკოლამდელი აღზრდისა და განათლების შესახებ საქართველოს კანონპროექტის“ განხილვას და იწყებს თუ არა ხელისუფლება მნიშვნელოვანი ცვლილებების დაწყებას იმ სფეროს წარმომადგებლების გარეშე, ვისაც უშუალოდ ეხება რეფორმა? ამ საკითხზე „ბათუმელები“ ბათუმის მე-3 საბავშვო ბაღის გამგეს ნანა თედორაძეს და ბათუმის საბავშვი ბაღების გაერთიანების ხელმძღვანელს, ნატალია ზაქარეიშვილს ესაუბრა.

„მე მივიღე წერილი პარლამენტიდან, ადამიანის უფლებათა დაცვის კომიტეტიდან რომ  მივსულიყავი ამ შეხვედრაზე და მე როგორ წავიყვანდი საბავშვო ბაღების ხელმძღვანელებს შეხვედრაზე? ეს კითხვა ჩემი მისამართით არ უნდა დაისვას.  მე ყველა საკითხში ჩახედული ვარ და შემიძლია განვიხილო ბაღების პრობლემები“-გვეუბნება ნატალია ზაქარეიშვილი.

მისი თქმით, ყველაზე მნიშვნელოვანი საკითხი რაც კანონპროექტის განხილვისას დააყენა,  ინკლუზიურ პროგრამაში ჩართულ ბავშვებს შეეხებოდა.

„ვფიქრობ რომ შშმ ბავშვების ინტეგრაციისთვის მნიშვნელოვანია რომ ისინი საბავშვო ბაღებმა მიიღონ, მაგრამ ჯგუფში სადაც 35 ბავშვია, ძალიან რთულია. შეხვედრაზე მითხრეს რომ ამ საკითხზე იმსჯელებენ“.

 

ნატალია ზაქარეიშვილი

მე-3 საბავშვო ბაღის გემგე ნანა თედორაძე მიიჩნევს რომ მსგავს შეხვედრებზე  ამ სფეროს წარმომადგენლების მონაწილეობა მნიშვნელოვანია:

„ჩვენ არც კი ვიცოდით თუ ახალი კანონპროექტის განხილვა იყო. ვფიქრობ, არც ბაღების გაერთიანების ხელმძღვანელმა იცოდა, რადგან ბაღში ღონისძიება გვქონდა და ჩვენთან უნდა მოსულიყო. როცა დავურეკეთ, მაშინ გვითხრა რომ შეხვედრაზე იყო წასასვლელი“-გვეუბნება ნანა თედორაძე.

საბავშვო ბაღის გამგე ამბობს, რომ რეფორმა დაგვიანებულია, თუმცა მისი განხორციელება აუცილებელია:

„ჩვენ უკვე წლებია ამ თემაზე ვსაუბრობთ და რეფორმის საჭიროებას ვხედავ. ჯერ ინფრასტრუქტურა უნდა მოწესრიგდეს. ჩვენს ბაღში ეს მოწესრიგებულია და ცოტა ხნის წინ ერთი სართულიც დავაშენეთ, სტანდარტიზაციის შემთხვევაში იმ რაოდენობის ბავშვს რაც დღეს გვყავს, ვეღარ მივიღებთ.“

სტანდარტიზაციის მიხედვით, ერთ ჯგუფში 25-ზე მეტი ბავშვის მიღება დაუშვებელია. მე-3 საბავშვო ბაღში, რომელიც ერთ-ერთი მაღალკონტინგენტიანი საბავშვო ბაღია,  ჯგუფში 35 აღსაზრდელია. ბაღების დიდ ნაწილს ყველა აღსაზრდელის დაძინების პირობები არ აქვთ, რის გამოც ბავშვებს მაგიდაზე აძინებენ.

„როცა ახალი ბაღები აშენდება, ეს ბავშვებიც იქ გადანაწილდებიან“- გვეუბნება ნანა თედორაძე.

რეფორმა ითვალისწინებს სკოლამდელი აღზრდის დაწესებულებებისთვის ახალი საგანმანათლებლო პროგრამების შემუშავებასაც. დღეს საბავშვო ბაღებს სხვადასხვა ტიპის პროგრამებით უწევთ მუშაობა.

„გვქონდა ეროვნული პროგრამა და პროგრამა – „ნაბიჯ-ნაბიჯ“, რომელიც მომწონს, რადგან შედეგზეა ორიენტირებული. ვმუშაობდით „ილიაუნის“ პროგრაგრამითა. ახალი სასწავლო წლიდან მოგვცეს საპილოტე პროგრამა, რომელიც „იუნისეფის“ მხარდაჭერით ხორციელდება და გათვლილია მხოლოდ 5-იდან 6 წლამდე აღსაზრდელებისთვის. ახალი პროგრამებიც ალბათ ამის მსგავსი იქნება“-გვეუბნება  ბაღის გამგე.

კანონპროექტზე მსჯელობისას ითქვა, რომ საბავშვო ბაღებში პროფესიონალი კადრების დეფიციტია და რეფორმა საკადრო სისტემასაც შეხება. საუბარია ასევე აღმზრდელის სტატუსის, მასწავლებლის სტატუსით ჩანაცვლებაზე.

„ის რომ პროფესიონალი კადრების დეფიციტია, ამ მოსაზრებას ნაწილობრივ ვეთანხმები, რადგან ყველა აღმზრდელს არ აქვს უმაღლესი ან პედაგოგიური განათლება. თუმცა, მე ვფიქრობ რომ გამოცდილებაც ძალიან მნიშვნელოვანია“-ამბობს ნანა თედორაძე.

მისი თქმით, აქამდე არც მოეთხოვებოდათ აღმზრდელებს პედაგოგიური  განათლება და საშუალო განათლებაც საკმარისი იყო.

„მაგრამ თუ აღმზრდელს მიეცემა პედაგოგის კვალიფიცია, ბუნებრივია გაიზრდება მისი მოვალეობებიც და სახელფასო ანაზღაურებაც და განათლებაც შესაბამისი მოეთხოვება. საერთოდ, სკოლამდელი  განათლება უნდა ჰქონდეს მიღებული აღმზრდელს, მაგრამ სტაჟიც ძალიან მნიშვნელოვანია“.

ნანა თედორაძის აზრით, საბავშვო ბაღების რეფორმის შემდეგ, შესაძლებელია კერძო ბაღებმა კონკურენციას ვეღარ გაუძლოს.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com