Batumelebi | ბათუმში საპროტესტო აქციაზე 6 პირი დააკავეს ბათუმში საპროტესტო აქციაზე 6 პირი დააკავეს – Batumelebi
RU | GE  

ბათუმში საპროტესტო აქციაზე 6 პირი დააკავეს

დღეს, 13 დეკემბერს, აჭარის მთავრობასთან საპროტესტო აქციაზე პოლიციამ კიდევ 6 პირი დააკავა – ყველა მათგანი „ნაციონალური მოძრაობის“ მხარდამჭერია. აჭარის პოლიციის უფროსის, კოტე ანანიაშვილის ინფორმაციით, ინციდენტის დროს ერთი პოლიციელი შეუძლოდ გახდა.

ენმ-ს აჭარის ორგანიზაციის ხელმძღვანელის, გიორგი კირთაძის ინფორმაციით, ბოლო დღეებში პოლიცია ბევრად აგრესიული გახდა, ვიდრე აქამდე იყო. „ანანიაშვილის [აჭარის პოლიციის უფროსი] მიღმა, ვიღაც სხვა პოლიციელები გამოჩნდნენ, რომლებიც აგრესიულები არიან. მათაც ფორმა აცვიათ“, – ამბობს გიორგი კირთაძე.

მისივე ინფორმაციით, დაკავებული პირები რამდენიმე დღის წინ პოლიციამ 2000-2000 ლარით დააჯარიმა. „მაღაზიაში გავიდნენ, იქვე ახლოს. ბიჭებმა იცოდნენ, რომ მაგ ტერიტორიაზე გასვლის გამო არ აჯარიმებდნენ. იმ ღამეს დააჯარიმეს საკარანტინო რეჟიმის დარღვევის მოტივით. დღეს დაკავებულთაგან ოთხი ახალგაზრდა – ირაკლი და თორნიკე ჭელიძეები, მუხრან ბერიძე და მინდია მელაძე სწორედ იმ ღამეს დააჯარიმეს 2000 ლარით“, – გვითხრა გიორგი კირთაძემ.

შს სამინისტროს პრესცენტრის ინფორმაციით, აქციის მონაწილეები – სულ 6 პირი პოლიციამ ადმინისტრაციული წესით დააკავა. დღემდე არსებული პრაქტიკით, პოლიციის მიერ ამ მოტივით დაკავებულ აქციის მონაწილეებს სასამართლოც აჯარიმებს – ზოგ შემთხვევაში 500 ლარით, ზოგ შემთხვევაში კი 1000 ლარით.

___

უკვე ერთ თვეზე მეტია აჭარის მთავრობასთან საპროტესტო აქციას მართავს ოპოზიცია. ოპოზიციური პარტიების წარმომადგენლები და მათი მხარდამჭერები 31 ოქტომბრის არჩევნების შედეგებს არ ცნობენ. მათ მიაჩნიათ, რომ ქვეყანაში არჩევნები გაყალბდა.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.