ვინ იქნება დეპუტატი აჭარის უმაღლეს საბჭოში „ქართული ოცნებიდან“ [სია]

დღეს, 3 დეკემბერს, ცნობილი გახდა, რომ „ოცნების“ აჭარის უმაღლესი საბჭოს სიის ათეულიდან სამმა მომავალმა დეპუტატმა მანდატზე უარი თქვა. კერძოდ, უმაღლეს საბჭოში არ შევლენ აჭარის მთავრობის თავმჯდომარე თორნიკე რიჟვაძე, ფინანსთა და ეკონომიკის მინისტრი ჯაბა ფუტკარაძე და მისი მოადგილე თინა ზოიძე.

არჩევნების შედეგების მიხედვით 21-წევრიან აჭარის უმაღლეს საბჭოში პროპორციული სიით „ქართული ოცნების“ 11 წევრი უნდა შევიდეს.

სიის პირველი ნომერი თორნიკე რიჟვაძე იყო.

სიის მეორე ნომერია წინა მოწვევის უმაღლესი საბჭოს თავმჯდომარე დავით გაბაიძე, რომელსაც სავარაუდოდ იმავე პოსტზე წარადგენენ.

სიის მესამე ნომერი იყო მოქმედი ფინანსთა და ეკონომიკის მინისტრი ჯაბა ფუტკარაძე, მეოთხე კი – თინა ზოიძე. მათ მანდატებზე უარი თქვეს.

რიგითობის მიხედვით შემდეგ მოდის გიორგი მანველიძე, წინა მოწვევის უმაღლესი საბჭოს წევრი და საფინანსო-საბიუჯეტო კომისიის თავმჯდომარე. 2020 წლის საქართველოს პარლამენტისა და აჭარის უმაღლესი საბჭოს არჩევნებზე ის „ოცნების“ ბათუმის შტაბს ხელმძღვანელობდა.

სიის მეექვსე ნომერი ირაკლი ჭეიშვილია, რომელიც ასევე წინა მოწვევის უმაღლესი საბჭოს წევრი და „ოცნების“ ფრაქციის თავმჯდომარეა.

სიაში მეშვიდე ნომერია ნადიმ ვარშანიძე – ხელვაჩაურის საკრებულოს ყოფილი თავმჯდომარე .

მერვე ნომერი „ოცნების“ სიაში ფატი ხალვაშია, წინა მოწვევის პარლამენტის წევრი „ოცნებიდან“ , შემდეგ მოდიან ასევე წინა მოწვევის უმაღლესი საბჭოს წევრები: დავით თედორაძე, ლადო მგალობლიშვილი და დავით ბაციკაძე.

უმაღლეს საბჭოში შესვლას შეძლებენ ასევე სიი მე-12 ნომერი – მარინე გვიანიძე, „ბათუმის წყლის“ დირექტორი და მე-13 ნომერი – ილია ვერძაძე, რომელიც ასევე წინა მოწვევის უმაღლესი საბჭოს წევრია.

დარჩენილი შვიდი მანდატი პროპორციული სიით „ერთიან ნაციონალურ მოძრაობას“ ერგო, თუმცა ოპოზიცია იმ მოტივით, რომ არჩევნები გაყალბდა, უმაღლეს საბჭოში არ შედის, შესაბამისად აჭარის უმაღლესი საბჭო ერთპარტიული იქნება.

ასევე, აჭარის უმაღლეს საბჭოში შევა სიის მე-14 ნომერი, ლაშა სირაბიძე, რომელიც ბათუმის საკრებულოს წევრია „ოცნებიდან“.

გარდა ამისა, აჭარის უმაღლეს საბჭოში იქნება 3 მაჟორიტარი დეპუტატი „ქართული ოცნებიდან,“ – ცოტნე ანანიძე, ტიტე აროშიძე და ფრიდონ ფუტკარაძე.