საპროტესტო აქცია ბათუმში ორმეტრიანი დისტანციით [ვიდეო]

ბათუმში საპროტესტო აქცია აჭარის მთავრობის სახლთან გრძელდება. აქციის მონაწილეები დღეს 3 საათზე შეიკრიბნენ. მოთხოვნა უცვლელია – არჩევნების ხელახლა ჩატარება. აქციაზე დღეს ყველაზე ხშირად ლიდერები სოციალური დისტანციის დაცვის მოთხოვნისკენ მოუწოდებდნენ.

აჭარის მთავრობის სახლის წინ აქციის მონაწილეებმა სპეციალური სტიკერები გააკრეს, რომელთა შორის მანძილი 2 მეტრია.

საპროტესტო აქციის მონაწილეებს დღევანდელ აქციაზე თემურ ბერიძემაც მიმართა. ის ხულოს არქივის უფროსია და ინტერესთა კონფლიქტს ედავებიან. მას კონკრეტული ბიზნესკომპანია აქვს და ამბობს, რომ თორნიკე რიჟვაძის მამასთან დაახლოვებული პირები ტენდერის დათმობას სთხოვდნენ. ამჟამად თემურ ბერიძის წინააღმდეგ ადმინისტრაციული საქმისწარმოება მიმდინარეობს ხულოს საარქივო სამმართველოში.

დღევანდელ აქციას საყვირებით შეუერთდნენ ტაქსის მძღოლებიც.

არჩევნების ხელახლა ჩატარების მოთხოვნით საპროტესტო აქციები ბათუმში 3 ნოემბრიდან პერმანენტულად იმართება. აქციის მონაწილეების აჭარის მთავრობის სახლის წინ ღამითაც რჩებიან. აქ გაშლილია კარვებიც.

საპროტესტო აქციის მონაწილეები მიიჩნევენ, რომ არჩევნები საქართველოში გაყალბდა. 8 პოლიტიკურმა პარტიამ, რომელსაც საპარლამენტო მანდატები ერგო, უარს ამბობს პარლამენტში შესვლაზე.