ქართველმა მეზღვაურებმა, რომლებიც ტოგოს რესპუბლიკაში, ქალაქ ლომეში იმყოფებიან, ქალთა საფეხბურთო კლუბ „ლანჩხუთს“ გემზე საქართველოს დროშის აღმართვითა და ჰიმნის აჟღერებით მიულოცეს უეფას ჩემპიონთა ლიგის საკვალიფიკაციო ეტაპზე გასვლა.
„საღამო მშვიდობისა საქართველო, საღამო მშვიდობისა ლანჩხუთი! ქალთა საფეხბურთო გუნდს ვულოცავთ ამ ბრწყინვალე გამარჯვებას ატლანტიკის ოკეანიდან, სამი სტადიონის სიგრძის გემიდან. 22 ქართველი გილოცავთ ამ გამარჯვებას და მრავალი მიღწევები გქონოდეთ წინ“ – ასე მიმართეს მეზღვაურებმა გუნდის ფეხბურთელებს.
ლანჩხუთის ქალ ფეხბურთელთა გუნდმა ჩემპიონთა ლიგის მე-2 საკვალიფიკაციო ეტაპზე რუმინეთის „კლუჟი“ სტუმრად დაამარცხა ანგარიშით 1-0 და შემდეგ ეტაპზე გავიდა, რაც იმას ნიშნავს, რომ „ლანჩხუთი“ გათამაშების 32 საუკეთესო გუნდს შორისაა.
ქსკ „ლანჩხუთი“ პირველი ქართული გუნდია, რომელიც ჩემპიონთა ლიგის დასკვნით ეტაპზე გავიდა.
