დღეს, 20 ნოემბერს, თბილისში, მიკროსაფინანსო ორგანიზაცია MBC-ის წერეთლის გამზირის ფილიალში მძევლები აიყვანეს. შსს-ს ინფორმაციით, შეიარაღებულ პირს მძევლად 9 ადამიანი ჰყავს.
ადგილზე ათობით პოლიციელია მობილიზებული.
“წერეთლის გამზირზე, ერთ-ერთ მიკროსაფინანსო ორგანიზაციაში მოხდა თავდასხმა. ადგილზე იმყოფება პოლიციური ჯგუფები. ჩვენს ხელთ არსებული ინფორმაციით მიკროსაფინანსო ორგანიზაციაში არის 9 მძევალი და ერთი შეიარაღებული პირი”, – განაცხადა საპატრულო პოლიციის დეპარტამენტის უფროსმა ვაჟა სირაძემ ჟურნალსიტებთან.
დაახლოებით ერთი თვის წინ, 22 ოქტომბერს ზუგდიდში, ბანკის შენობაში შეიჭრა შეიარაღებული პირი და 19 პირი აიყვანა მძევლად. დაახლოებით 23:00 საათზე მან ბანკის შენობა დატოვა – მოთხოვნილ თანხასა [სავარაუდოდ 500 ათასი დოლარი] 3 მძევალთან ერთად. მოგვიანებით მან მძევლებიც გაათავისუფლა და გაუჩინარდა.
შს სამინისტრომ მოგვიანებით განაცხადა, რომ ბანკზე თავდასხმაში ბრალდებულია ბადრი ესებუა – ყოფილი ჯარისკაცი. მას დღემდე ეძებენ.
___
წაიკითხეთ ზუგდიდში ბანკზე თავდასხმის დეტალები
https://netgazeti.ge/news/491202/
