Batumelebi | რა ბედი ეწია რობოტ პეპერს, რომელიც ჯანდაცვის მინისტრს უნდა დახმარებოდა რა ბედი ეწია რობოტ პეპერს, რომელიც ჯანდაცვის მინისტრს უნდა დახმარებოდა – Batumelebi
RU | GE  

რა ბედი ეწია რობოტ პეპერს, რომელიც ჯანდაცვის მინისტრს უნდა დახმარებოდა

საფრანგეთიდან ჩამოტანილი რობოტი პეპერი, რომელიც ჯანდაცვის მინისტრმა, ეკატერინე ტიკარაძემ ივნისის თვეში საჯაროდ წარუდგინა საზოგადოებას, გაუჩინარდა.

საზოგადოებას რობოტი პეპერი იმით დაამახსოვრდა, რომ ჯანდაცვის სამინისტროს ანგარიშის წარდგენისას, 18 ივნისს, რობოტმა უკანსვლა დაიწყო მოულოდნელად და სცენიდან გადავარდა. თუმცა დაიჭირეს და დამტვრევას გადაარჩინეს.

ეკატერინე ტიკარაძის თქმით, რობოტი პეპერი მას Covid 19-თან ბრძოლაში უნდა დახმარებოდა. ინტენსიური მოვლის განყოფილებებში კი ექიმის ასისტენტად უნდა გამოეყენებინათ მას შემდეგ, რაც რობოტის შესაძლებლობებს შეისწავლიდნენ.

მინისტრმა მაშინ საზოგადოებას უთხრა, რომ რობოტი ქართულს ისწავლიდა, რომ ეს იყო უახლესი სიტყვა ქართულ ტელემედიცინაში და რომ პეპერის შესახებ დეტალურ ინფორმაციას ის მოგვიანებით გაავრცელებდა.

ამ განცხადების შემდეგ 5 თვე გავიდა და არამცთუ დეტალური ინფორმაცია, არანაირი ინფორმაცია პეპერის ახლანდელი მდგომარეობისა და მისი საქმიანობის შესახებ არ გვაქვს.

ჯანდაცვის სამინისტროს პრესსამსახურს „ბათუმელებმა“ ჰკითხა:

  • როგორ იყენებს სამინისტრო კოვიდთან ბრძოლაში რობოტ პეპერს;
  • შეისწავლეს თუ არა საქართველოში ჯანდაცვის სისტემის წარმომადგენლებმა მისი შესაძლებლობები;
  • რამდენი გადაიხადა სამინისტრომ რობოტის შესაძენად.

პრესსამსახურში „ბათუმელებს“ უთხრეს, რომ რობოტ პეპერზე საუბარი არ სურთ. გვითხრეს მხოლოდ ის, რომ რობოტში სახელმწიფოს ფული არ გადაუხდია.

ვებგვერდებზე, სადაც რობოტი პეპერის შეძენას სთავაზობენ მყიდველებს, მისი საბოლოო ფასი 14 600 დოლარია.

სად არის და რა ბედი ეწია საქართველოში საფრანგეთიდან ჩამოტანილ რობოტ პეპერს, უცნობია.

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com