აჭარის ტურიზმისა და კურორტების დეპარტამენტის ორგანიზებით დაიწყო ტრენინგების მეორე ეტაპი კერძო სექტორის წარმომადგენლებისთვის. ტრენინგის ფარგლებში იგეგმება 145 ადამიანის გადამზადება ისეთ საკითხებში, როგორებიცაა კვებისა და განთავსების ობიექტებში მომსახურების ხარისხის გაუმჯობესება და სტანდარტები, სასტუმროს განყოფილებების ფუნქციონირება, მარკეტინგი და გაყიდვები, ასევე კვების ობიექტების მართვის თანამედროვე პრინციპები და სურსათის უვნებლობა.
ტრენინგს ძირითადათ კვებისა და განთავსების ობიექტების მენეჯერები, მიმტანები, დამლაგებლები, რეზერვაციის სამსახურის თანამშრომლები და ტუროპერატორები ესწრებიან. ტრენინგის მიზანი რეგიონში მომსახურების ხარისხის ამაღლება და გაუმჯობესებაა. ტრენინგი სასტუმრო ჰილტონში 13 დეკემბერს დაიწყო და 24 დეკემებერს დასრულდება. ტრენინგის დასასრულს მონაწილეებს სერთიფიკატები გადაეცემათ.
მიმდინარე წლის დასაწყისში დეპარტამენტმა უკვე გადაამზადა ტურიზმის დარგში დასაქმებული 155 ადამიანი. წლის ბოლოს, დეპარტამენტის ცნობით, კი ეს რაოდენობა 300-მდე გაიზრდება.