მთავარი,სიახლეები

ბათუმის ვერცხლისფერი ნაძვის ხე

14.12.2015 • 3119
ბათუმის ვერცხლისფერი ნაძვის ხე

ახალ 2016 წელს, ბათუმელებს  ვერცხლისფერი ნაძვის ხე ექნებათ. მერიამ ნაძვის ხის ფერის შეცვლის გადაწყვეტილება ტურისტური მოსაზრებით მიიღო. მერიის ბიუჯეტიდან ქალაქის გაფორმების სამუშაოებისთვის მილიონ 420 000 ლარია გამოყოფილი.

ბათუმის ახალი ნაძვის ხე „ფეისბუკში“ უკვე გახდა მსჯელობის საგანი. ნაწილი ამბობს, რომ ნაძვის ხე მოსწონს, ნაწილის აზრით კი, ჯერ ვერ გადაუწყვეტია, რას მიამსგავსოს ახალი ნაძვის ხე:  „ფასკუნჯის ნისკარტს, ჭარმაგი ბურატინოს ცხვირს თუ შრეკის შიბაქს“.

ბათუმის მერიის პრესსამსახურში გვეუბნებიან, რომ ნაძვის ხის ვერცხლის ფერებში გადაწყვეტის იდეა,  მერის მრჩეველს ალეკო თევზაძეს ეკუთვნის.

„ალეკო თევზაძე ტურიზმის საკითხებშია მრჩეველი და მან გადაწყვიტა, რომ ასე უკეთესი იქნებოდა. მისი კონცეფციით გაკეთდა“ – ამბობს მერის პრესსპიკერი თეკლა ჩიჩუა.

ახალი ნაძვის ხის მორთვას ტენდერში გამარჯვებული კომპანია შპს „აჭარგანათება“ უზრუნველყოფს.

მერიის ინფორმაციით, ნაძვის ხეზე დამონტაჟდება გირლიანდები, მანათობელი ბურთები, შეიმკობა წიწვებით, რომლის დასრულების შემდეგ, რამოდენიმე ტიპის (თბილ-ცივი) მანათობელი კონსტრუქციის მონტაჟი და არსებული კონსტრუქციების შეკეთება განხორციელდება.

საახალწლო აქსესუარებით გაფორმდება სკვერები, ქუჩები. მერიის ინფორმაციით, ტენდერში გამარჯვებულმა კომპანიამ უნდა განახორციელოს არსებული აქსესუარების რესტავრაცია და მისი მონტაჟი შემდეგ მიმართულებებზე: დემეტრე თავდადებულის, ვაჟა-ფშაველას, ლუკა ასათიანისა და 26 მაისის ქუჩებზე. ყველა ელექტროსაქონელი დააკმაყოფილებს ჰერმეტულობის შესაბამის დონეს.

„წელს ბათუმის საახალწლო განათება ახალი კონცეფციის შესაბამისი იქნება, დამონტაჟდება ახალი კონსტრუქციები. განათება იქნება ძირითადად ორ ფერში და თოვლის ეფექტისგამომსახველი.  ქალაქს 27 დასახელების საახალწლო აქსესუარი უნდა მიეწოდოს. შეძენილი აქსესუარები განთავსდებარუსთაველის და გოგებაშვილის, გორგილაძის ქუჩებზე“ – ნათქვამია მერიის ინფორმაციაში.

მთლიანობაში ქალაქს საახალწლოდ  27 დასახელების საახალწლო აქსესუარი ექნება, რომლის შეძენისთვის ქალაქის ბიუჯეტიდან 1 419 999,96 ლარი გამოიყო.

 

DSCN6058

გადაბეჭდვის წესი


ასევე: