Batumelebi | „ევექსი“ აცხადებს, რომ გრიპის ვაქცინა შემოიტანეს – ფასი 70 ლარია „ევექსი“ აცხადებს, რომ გრიპის ვაქცინა შემოიტანეს – ფასი 70 ლარია – Batumelebi
RU | GE  

„ევექსი“ აცხადებს, რომ გრიპის ვაქცინა შემოიტანეს – ფასი 70 ლარია

კომპანია „ევექსი“ განცხადებას ავრცელებს სეზონური გრიპის ვაქცინის გაყიდვასთან დაკავშირებით.

კომპანიის ცნობით, „ევექსისვე“ კლინიკებში ფრანგული წარმოების „ვაქსიგრიპის“ 4-კომპონენტიანი ვაქცინა 10 ნოემბრიდან იქნება ხელმისაწვდომი.

„პანდემიის გამო ვაქცინებს კომპანია 2 ნაწილად მიიღებს (პირველი ნაწილი – 10 ნოემბრიდან, მეორე ნაწილი – ნოემბრის ბოლოს) და ხელმისაწვდომი იქნება ევექსის ყველა კლინიკაში.
ვაქცინაციისთვის აუცილებელია მიმართოთ თქვენთვის სასურველ ევექსის კლინიკას.

მათთვის კი, ვინც შეზღუდული რაოდენობის გამო 10 ნოემბრიდან ვერ მიიღებს ვაქცინას, შესაძლებლობა გექნებათ წინასწარ დარეგისტრირდეთ და აიცრათ ნოემბრის ბოლოს.

ამისათვის, გთხოვთ შეავსოთ მარტივი ფორმა. 

აქვე გვინდა განვმარტოთ, რომ ევექსი კლინიკებში 3-კომპონენტიანი ვაქცინა შეზღუდული რაოდენობით სექტემბრის მეორე ნახევარში იყო ხელმისაწვდომი,“ – აღნიშნულია კომპანიის განცხადებაში.

კომპანიის განცხადებით, სეზონური გრიპის ვაქცინის ფასი წელს 70 ლარია. გასულ წლებში ოთხკომპონენტიანი ვაქცინის ფასი საშუალოდ 40 ლარი იყო.

წელს სეზონური გრიპის ვაქცინაზე მოთხოვნა საქართველოში გაიზარდა, თუმცა ამ დრომდე ვაქცინა დეფიციტურია.

საქართველოში ამჟამად მიმდინარეობს სეზონური გრიპის უფასო ვაქცინაცია რისკჯგუფებისთვის.

დაავადებათა კონტროლის ეროვნული ცენტრის ცნობით, იმუნიტეტის ჩამოყალიბებას 2-3 კვირა სჭირდება, ამიტომ აცრა უნდა გაკეთდეს გრიპის სეზონის დაწყებამდე. ცენტრის ცნობით, ვაქცინაციისთვის საუკეთესო დროა ოქტომბერი და ნოემბრის დასაწყისი, თუმცა სეზონური გრიპის ვაქცინის გაკეთება რეკომენდებულია სეზონის განმავლობაში.

გრიპის სეზონი წელს განსაკუთრებით ბევრს აშფოთებს, რადგან ამ დაავადების მთავარი სიმპტომები – ცხელება, ხველა, ყელის ტკივილი, თავის ტკივილი და საერთო სისუსტე ახალი კორონავირუსის სიმპტომების მსგავსია.

კორონავირუსისა და გრიპის ზოგადი სიმპტომები

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com