Batumelebi | ოპერატორები დღეში 18 000-მდე ზარს პასუხობენ – 112 ოპერატორები დღეში 18 000-მდე ზარს პასუხობენ – 112 – Batumelebi
RU | GE  

ოპერატორები დღეში 18 000-მდე ზარს პასუხობენ – 112

„კორონავირუსის პანდემიამდე ცენტრში 24 საათის განმავლობაში საშუალოდ 13 000-მდე ზარი შემოდიოდა, დღევანდელი მონაცემებით კი, ოპერატორები 18 000-მდე ზარს პასუხობენ. შესაბამისად, მობილიზებულია დამატებითი ცვლები, რათა თითოეულ ზარზე ოპერატიულად მოხდეს რეაგირება,“ – აცხადებს შინაგან საქმეთა სამინისტროს საზოგადოებრივი უსაფრთხოების მართვის ცენტრი – 112.

ცენტრის ინფორმაციით, თითოეულ მოქალაქეს კორონავირუსისთვის დამახასიათებელი სიმპტომების შემთხვევაში, შეუძლია დარეკოს 112-ზე. ვირუსთან დაკავშირებული შეტყობინებები კი ოპერატორების მხრიდან კლასიფიცირდება და მწვავე შემთხვევები – სასწრაფო სამედიცინო დახმარების ცენტრს, ხოლო არამწვავე გამოძახებები – ოჯახის ექიმებს გადაეცემა.

„ქვეყანაში შექმნილი ეპიდვითარების მიუხედავად, 112-ში, 24 საათის განმავლობაში, 3000-მდე არამიზნობრივი და საინფორმაციო ტიპის ზარი ფიქსირდება, რაც აფერხებს მუშაობის პროცესს… მოქალაქეებს კი, გთხოვთ, დარეკეთ, მხოლოდ მაშინ, როცა გესაჭიროებათ საპატრულო პოლიციის, სასწრაფო სამედიცინო და სახანძრო/სამაშველო სამსახურების დახმარება. ასევე, დაგვიკავშირდით კორონავირუსული სიმპტომების გამოვლენისთანავე, რათა მიიღოთ შესაბამისი კონსულტაცია ოჯახის ექიმისგან.

112 არის გადაუდებელი დახმარების ნომერი, კორონავირუსის მართვის პროცესში დაწესებულ წერტილოვან შეზღუდვებსა და დაშვებებზე დაკავშირებული საინფორმაციო ტიპის შეკითხვებისთვის შეგიძლიათ მიმართოთ მთავრობის ცხელ ხაზს – 144“ – აღნიშნულია 112-ის განცხადებაში.

გარდა ამისა, მთავრობის 19 ოქტომბრის დადგენილებით, ცვლილება შევიდა იზოლაციისა და კარანტინის წესებში, რომლის მიხედვითაც:

დაავადებათა კონტროლისა და საზოგადოებრივი ჯანმრთელობის ეროვნული ცენტრი, COVID19-ის დიაგნოზის დადასტურებულ შემთხვევებზე ინფორმაციას [ახალი შემთხვევების სახელობით სიას ელექტრონული ფორმატით, მათი საკონტაქტო მონაცემების მითითებით] ყოველდღიურად აწვდის 112-ს; 112 კი, ამ ინფორმაციას, პაციენტის საწყისი კლინიკური შეფასების მიზნით, აწვდის შესაბამის ამბულატორიულ დაწესებულებებს.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com