საქალაქთაშორისო ტრანსპორტის მოძრაობა [მგზავრთა გადაყვანა], როგორც აჭარის ავტონომიური რესპუბლიკის ტერიტორიაზე, ასევე აჭარის მიმართულებით, 19 ოქტომბრიდან აღარ განახლდება – უთხრეს „ბათუმელებს“ მთავრობის ცხელ ხაზზე.
დღეიდან, 19 ოქტომბრიდან, აჭარაში მხოლოდ მუნიციპალური ტრანსპორტის მოძრაობა განახლდა [ანუ აჭარის მუნიციპალიტეტებს შორის და ასევე აჭარასა და სხვა რეგიონებს შორის მგზავრთა სამარშრუტო მიკროავტობუსებით და ავტობუსებით გადაყვანა კვლავ აკრძალულია].
საქართველოს მთავრობის 15 ოქტომბრის დადგენილებით აჭარაში საქალაქთაშორისო ტრანსპორტის მოძრაობაც უნდა განახლებულიყო, თუმცა, „ეპიდემიოლოგიური სიტუაციიდან გამომდინარე, 18 ოქტომბერს, საღამოს, მიღებული იქნა გადაწყვეტილება აჭარაში და აჭარის მიმართულებით მგზავრთა გადაყვანა მიკროავტობუსებით და ავტობუსებით არ განახლდეს. როდის განახლდება საქალაქთაშორისო მოძრაობა, ამ ეტაპზე უცნობია“, – გვითხრეს მთავრობის ცხელ ხაზზე.
შენიშვნა: დღეს, 19 ოქტომბერს, დღის მეორე ნახევარში გამოქვეყნდა მთავრობის დადგენილება, რომლის მიღების თარიღად ასევე 19 ოქტომბერია მითითებული. „აჭარის ავტონომიური რესპუბლიკის ადმინისტრაციულ საზღვრებში, ასევე აჭარის ავტონომიური რესპუბლიკის მიმართულებით ან/და უკუმიმართულებით ჩერდება მგზავრთა საქალაქთაშორისო გადაყვანა M2 და M3 კატეგორიების ავტოსატრანსპორტო საშუალებებით.“ – აღნიშნულია დადგენილებაში.
