„აჭარის მთავრობის თავმჯდომარეს ნუ სთხოვთ ახლა ამ კონტექსტში თვითმმართველობის საქმეებში ჩარევას“, – აღნიშნა დღეს, 17 ოქტომბერს, ბრიფინგზე თორნიკე რიჟვაძემ, აჭარის მთავრობის თავმჯდომარემ. მას ჟურნალისტებმა ხელვაჩაურის მერის, ჯუმბერ ვარდმანიძის მიერ „ბათუმელების“ ჟურნალისტის გინების ფაქტზე ჰკითხეს. თორნიკე რიჟვაძე ამბობს, რომ ეს საკითხი „პარტიის შიგნით გაარჩიეს“.
„როცა წინა შემთხვევებში თვითმმართველობებში ყოფილა კონკრეტული გადაადგილებები, ბრალს მდებდით თვითმმართველობის საქმეებში ჩარევაში, ახლა, როცა თქვენს კოლეგას ეხება და სამწუხარო და ამაზრზენია, როცა ჟურნალისტის მიმართ ხორციელდება ესეთი მიმართვა, ახლა მთხოვთ, რომ თვითმმართველობაში პირდაპირ ჩავერიო. მე პირდაპირ ვთქვი და განვაცხადე, რომ ამ კონკრეტული თანამდებობის პირს, რა თქმა უნდა, შეეშალა ბევრი მიმართულებით და ამ ყველაფერზე, რა თქმა უნდა, როგორც გუნდის შიგნით, ასევე სხვა მიმართულებებით მიდის მსჯელობა. როცა შინაარსობრივად იქნება დასკვნები გაკეთებული, რა თქმა უნდა, ყველას უნდა ეყოს იმის პასუხისმგებლობა, რომ მიიღოს შესაბამისი გადაწყვეტილება… პირდაპირ გეუბნებით, რომ პარტიის შიგნით, გუნდის შიგნით ყოფილა ამაზე გარჩევა მათ შორის და მომავალშიც იქნება ეს,“ – განაცხადა თორნიკე რიჟვაძემ.
აჭარის მთავრობის თავმჯდომარეს ჟურნალისტებმა ასევე ჰკითხეს ხელვაჩაურის მერის ფეშენებულური სახლის შესახებ, რომელსაც ის უკანონოდ აშენებს.
„იქ თუ არის ნებართვის პრობლემა, ან თუ საერთოდ უნებართვოა, მერწმუნეთ, რომ შესაბამის თვითმმართველობა და ადმინისტრაციული ორგანო გაატარებს უმკაცრეს ზომებს მიუხედავად იმისა, ვინ იქნება მერი, მინისტრი თუ მთავრობის თავმჯდომარე,“ – დასძინა თორნიკე რიჟვაძემ.
საუბარია Batumelebi.ge-ზე 12 ოქტომბერს გამოქვეყნებულ სტატიაში – „მილიონიანი უკანონო მშენებლობა, არჩევნები და უშვერი გინება – 3 ამბავი ხელვაჩაურის მერზე“ გამოყენებულ აუდიოჩანაწერზე, რომელშიც ისმის ჟურნალისტის მისამართით ხელვაჩაურის მერის გინება.
ხელვაჩაურის მერის გაღიზიანება მოჰყვა შეკითხვას, რატომ გადაადგილდება ის „ქართული ოცნების“ მაჟორიტარი კანდიდატის საარჩევნო კამპანიის დროს მერიის ანუ სახელმწიფოს ავტომანქანით, რასაც კანონი კრძალავს. ხელვაჩაურის მერმა ჟურნალისტი სიტყვიერად შეურაცხყო, შენიშვნის შემდეგ კი, რომ მას, როგორც არჩეულ მერს და უმაღლესი სასწავლებლის ლექტორს, არ აქვს უფლება მოქალაქეებს და ჟურნალიტებს ასე ესაუბროს, მერი კიდევ უფრო აგრესიული გახდა და გინებაზე გადავიდა.
