Batumelebi | კოვიდი: აქვს თუ არა მნიშვნელობა სისხლის ჯგუფს? – ორი კვლევის შედეგები კოვიდი: აქვს თუ არა მნიშვნელობა სისხლის ჯგუფს? – ორი კვლევის შედეგები – Batumelebi
RU | GE  

კოვიდი: აქვს თუ არა მნიშვნელობა სისხლის ჯგუფს? – ორი კვლევის შედეგები

აქვს თუ არა კორონავირუსით ინფიცირებასა და დაავადების მიმდინარეობის სიმძიმისთვის მნიშვნელობა ადამიანის სისხლის ჯგუფს? – ჟურნალ Blood Advances-ში გამოქვეყნებულ ორ ახალ კვლევაში ნათქვამია, რომ – აქვს.

ერთი კვლევის ფარგლებში შეისწავლეს თითქმის ნახევარი მილიონი ადამიანი დანიაში, რომელთაგან კოვიდდადებითი იყო 7422, ხოლო 466 232 – კოვიდუარყოფითი. აღმოჩნდა, რომ სისხლის პირველი ჯგუფის (O) წარმომადგენლები ნაკლებად ინფიცირდებიან კორონავირუსით, ვიდრე სისხლის სხვა ჯგუფების მქონე ადამიანები.

მეორე კვლევამ, რომელიც სწავლობდა კანადაში პაციენტებს, აჩვენა, რომ II (A) ან IV (AB) ჯგუფის სისხლის მქონე ადამიანებს უფრო ხშირად უვითარდებათ COVID19-ის მძიმე სიმპტომები, ვიდრე I (O) და III (B) სისხლის ჯგუფების მქონე ადამიანებს.

კვლევა: COVID19-ის მქონე პაციენტებს II ან IV სისხლის ჯგუფით უფრო მეტი რისკი აქვთ, რომ დასჭირდეთ სასუნთქი აპარატები, ვიდრე I და III ჯგუფის სისხლის მქონე პაციენტებს. 

II და IV სისხლის ჯგუფის მქონე კოვიდპაციენტებში, როგორც ჩანს, დაავადება უფრო მძიმედ მიმდინარეობს, ვიდრე I ან III სისხლის ჯგუფის პაციენტებში.

ეს პირველი შემთხვევა არ არის, როდესაც სისხლის ჯგუფები კორონავირუსთან მიმართებაში გამოიკვლიეს. ივნისში გერმანელი და ნორვეგიელი მკვლევარების მიერ ჩატარებული კვლევის შედეგადაც ჩანდა, რომ იმ პაციენტებში, რომელთაც მეორე ჯგუფის სისხლი აქვთ, COVID19-ის მძიმედ მიმდინარეობის რისკი ორჯერ უფრო მაღალია პირველი ჯგუფის სისხლის მქონე პაციენტებთან შედარებით. თუმცა მაშინდელი კვლევით III და IV ჯგუფის სისხლის მქონე პაციენტებში არ გამოვლენილა COVID19-ის მიმდინარეობის მკაფიო ტენდენცია სისხლის ჯგუფის მიხედვით.

BBC წერს, რომ ზოგიერთი გენეტიკური კვლევა, რომელიც ზაფხულში გამოქვეყნდა, აჩვენებს, რომ ABO გენს, რომელიც სისხლის ჯგუფთან არის დაკავშირებული, შეუძლია გარკვეული როლის შესრულება კორონავირუსით ინფიცირების შედეგებზე, თუმცა კვლევებმა მათ შორის ძლიერი კავშირი ვერ იპოვა, ამიტომ საკითხს, ნამდვილად ახდენს თუ არა ზეგავლენას Covid19-ის ინფექციაზე სისხლის ჯგუფი და თუ ასეა, რამდენად – უფრო მეტი კვლევა სჭირდება.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან