მოსახლეობის 73% ფიქრობს, რომ რუსული კანონი შეაფერხებს ევროკავშირში გაწევრიანებას – Edison Research

ტელეკომპანია „ფორმულა“ საერთაშორისო კვლევითი ორგანიზაციის, Edison Research-ის საზოგადოებრივი აზრის გამოკითხვის შედეგებს აქვეყნებს.

გამოკითხვის თანახმად, საქართველოში მოსახლეობის 73% ფიქრობს, რომ რუსული კანონი, მიღების შემთხვევაში, შეასუსტებს საქართველოს ევროკავშირში გაწევრიანების შანსებს, ხოლო 27%-ის აზრით, კანონი გააძლიერებს საქართველოს ევროკავშირში გაწევრიანების შანსებს.

ამავე გამოკითხვის თანახმად, კითხვაზე, თქვენი აზრით, [რუსული] კანონი უფრო სავარაუდოა რომ დაიცავს საქართველოს გარე გავლენისგან თუ გააძლიერებს რუსეთის გავლენას საქართველოზე, მოსახლეობის 69% ფიქრობს, რომ კანონი გააძლიერებს რუსეთის გავლენას საქართველოზე, ხოლო 31%-ს აზრით დაიცავს საქართველოს გარე გავლენისგან.

კითხვაზე, თქვენი აზრით, რას ემსახურება [რუსული] კანონი, მოსახლეობის 65% მიიჩნევს, რომ არასამთავრობო სექტორის და ოპოზიციური პარტიების შეზღუდვას, ხოლო 35%-ის აზრით, უცხოური გავლენის გამჭვირვალობის უზრუნველყოფას.

გამოკითხულთა 68% თვლის, რომ საქართველოში რუსული კანონი საჭირო არ არის.

საზოგადოებრივი აზრის გამოკითხვა Edison Research-მა ტელეკომპანია „ფორმულას“ დაკვეთით ჩაატარა.

„ფორმულას“ ცნობით, კვლევის ფარგლებში, პირისპირი გამოკითხვის მეთოდით, ქვეყნის მასშტაბით შემთხვევითი შერჩევით გამოიკითხა საქართველოში მცხოვრები 1 000 საარჩევნო უფლების მქონე 18 წლისა და მეტი ასაკის ადამიანი.

Edison Research-ის საზოგადოებრივი აზრის გამოკითხვის შედეგებით, 18-24 წლის მოსახლეობის 82%-ის აზრით, რუსული კანონი საჭირო არაა.

კვლევის ცდომილება არის +/- 3%, 95%-იანი სანდოობის დონისთვის. გამოკითხვა მიმდინარეობდა 16-26 აპრილის შუალედში.