პანდემიის გამო საქართველოში შემოსავალი სულ ცოტა 161 905-მა დასაქმებულმა დაკარგა. ეს არის კომპენსაციის მიმღებ პირთა რაოდენობა, რაც დასაქმების სააგენტომ მოგვაწოდა და რომლებზეც 200-ლარიანი დახმარება გაიცა.
„200 ლარი კომპენსაციის მიმღები პირები, რომელთა მონაცემებიც დამქირავებელმა 2020 წლის 1-ელ მაისამდე წარადგინა [შემოსავლების სამსახურში], კომპენსაციას [ბოლო ჩარიცხვას] ოქტომბრის ბოლოს მიიღებენ; ხოლო იმ კატეგორიას, რომელთა ინფორმაციაც 1-ელ ივლისამდე წარადგინეს, მათი კომპენსაციის თანხის ბოლო ჩარიცხვა 2020 წლის დეკემბერში იქნება“, – უთხრეს „ბათუმელებს“ დასაქმების ხელშეწყობის სახელმწიფო სააგენტოში.
200 ლარი კომპენსაცია 6 თვის განმავლობაში გაიცემა იმ დასაქმებულზე, რომელიც დაქირავებით საქმიანობას ეწეოდა 2020 წლის პირველი სამი თვიდან რომელიმე ერთ თვეს მაინც, იღებდა ხელფასს და საგანგებო მდგომარეობის პერიოდში შეუწყდა/შეუჩერდა შრომითი ურთიერთობა დამქირავებელთან ან/და დამქირავებლისგან არ იღებს ხელფასს [ამ 6 თვის განმავლობაში პირს კომპენსაციის მიღება უწყდება იმ მომენტიდან, როგორც კი მასზე ხელფასის გაცემა დაფიქსირდება].
დასაქმების სააგენტოს ინფორმაციით, 200-ლარიანი დახმარება 161 905-მა უნიკალურმა ბენეფიციარმა/დასაქმებულმა მიიღო და სულ დაირიცხა 106 288 400 ლარი:
- მაისის თვეში – 72 131 პირს გადაერიცხა 14 426 200 ლარი;
- ივნისის თვეში – 143 801 პირს გადაერიცხა 28 760 200 ლარი;
- ივლისის თვეში – 127 430 პირს გადაერიცხა 25 486 000 ლარი;
- აგვისტოს თვეში – 96 765 პირს გადაერიცხა 19 353 000 ლარი;
- სექტემბრის თვეში – 91 315 პირს გადაერიცხა 18 263 000 ლარი;
გარდა ამისა, ოფიციალური მონაცემებით, ერთჯერადი კომპენსაცია [300 ლარი] მიიღო ასევე 248 823-მა თვითდასაქმებულმა, რომლებიც ასევე შემოსავლის გარეშე დარჩნენ პანდემიის გამო. სახელმწიფო კომპენსაციის მისაღებად თვითდასაქმებულთა რეგისტრაციის ვადა 2020 წლის 1-ელ აგვისტოს დასრულდა.
დასაქმების სააგენტოს ინფორმაციით, 10 აგვისტოს მდგომარეობით, სულ დარეგისტრირდა კომპენსაციის მიმღები თვითდასაქმებული 251 690 პირი. აქედან, თუ სააგენტოს მონაცემებს შევადარებთ, დღევანდელი მდგომარეობით, კომპენსაცია [300 ლარი] არ მიუღია 2 867 დარეგისტრირებულ პირს. გადარიცხვები აგვისტოში დასრულდა, თუმცა, დოკუმენტაციის დაზუსტების შემდეგ, ოქტომბერში თანხა დამატებით 538 პირს გადაერიცხა.
სააგენტოს მონაცემებით, 248 823 თვითდასაქმებულს სულ დაერიცხა 74 646 800 ლარი:
- მაისის თვეში -29 981 პირს გადაერიცხა 8 994 300 ლარი;
- ივნისის თვეში – 74 558 პირს გადაერიცხა 22 367 400 ლარი;
- ივლისის თვეში – 58 831 პირს გადაერიცხა 17 649 200 ლარი;
- აგვისტოს თვეში – 84 915 პირს გადაერიცხა 25 474 500 ლარი;
- ოქტომბრის თვეში – 538 პირს გადაერიცხა 161 400 ლარი.
სტატისტიკის ეროვნული სამსახურის ოფიციალური მონაცემებით, 2020 წლის იანვარ-მარტში, ანუ პირველ კვარტალში, საქართველოში 22 700 კაცით ნაკლები დასაქმებული იყო, ვიდრე 2019 წელს.
2020 წლის აპრილ-ივნისში კი, ანუ მეორე კვარტალში, როცა ქვეყანაში პანდემია და კომენდანტის საათი იყო შემოღებული, დასაქმებულთა რაოდენობა, თუ საქსტატს დავეყრდნობით, 16 500-ით გაიზარდა პირველ კვარტალთან შედარებით.
2020 წლის მეორე კვარტალში, საქსტატის მონაცემებით, სულ დასაქმებული იყო 1 684 000 ადამიანი. თუმცა აქედან მინიმუმ, 138 227 საჯარო მოხელეა, რომლებიც ხელფასს სხვადასხვა დონის ბიუჯეტიდან იღებს [112 643 – საქართველოს ბიუჯეტიდან, 3 917 – აჭარისა და აფხაზეთის ბიუჯეტებიდან, 9 667 – თვითმმართველი ქალაქების, ხოლო 12 ათასი – დანარჩენი მუნიციპალიტეტების ბიუჯეტებიდან [აქ ერთ მუნიციპალიტეტში, საშუალოდ 200 დასაქმებული ავიღეთ. ამასთან, არიან დამატებით კიდევ შტატგარეშე თანამშრომლებიც, რომლებიც ხელფასს ბიუჯეტიდან იღებენ, თუმცა, მათი რაოდენობის შესახებ სრული მონაცემები ამ დროისთვის არ გვაქვს -ავტ.].
აქედან გამომდინარე, საჯარო სამსახურების გამოკლებით, კერძო სექტორში 1,5 მილიონი ადამიანი გამოდის დასაქმებული – ეს ოფიციალური მონაცემებით.
არსებულ სიტუაციაში, რა მდგომარეობაა უმუშევრობის კუთხით ქვეყანაში, რთული დასადგენია. 200-ლარიანი კომპენსაციის მიმღები პირებიდან რამდენი შედის სტატისტიკის ოფიციალურ მონაცემებში, როგორც დასაქმებული, უცნობია [კომპენსაციის მიმღები პირებიდან ზოგი კვლავ დასაქმებულად ითვლება, თუმცა ხელფასს ვერ იღებს, ზოგი კი – შემცირებაში მოყვა. ფაქტობრივად გაჩერებულია ტურიზმის სფერო, სათამაშო ბიზნესი, სარიტუალო დარბაზები, გასართობი ცენტრები და სხვა].
ვინ რას და როგორ გეგმავს უმუშევრობის დასაძლევად მაშინ, როცა ამომრჩეველი ნომერ პირველ პრობლემად სწორედ უმუშევრობას ასახელებს. ამ საკითხზე ვრცელ და დეტალურ განმარტებებს ყველა პარტიის საარჩევნო პროგრამაში ვერ იპოვით. „ოცნების“ საარჩევნო პროგრამას კი საერთოდ ვერ იპოვით, რადგან მმართველი პარტია მხოლოდ ვიდეოპრეზენტაციით შემოიფარგლა და განაცხადა, რომ კონკრეტულ ხედვებს, სფეროების მიხედვით, მოგვიანებით გააცნობდნენ ამომრჩეველს.
ამ თემაზე დეტალურად:
„ოცნებას“ უმუშევრობის დაძლევის პროგრამა არ აქვს, რას გეგმავენ სხვა პარტიები
