Batumelebi | კორონავირუსი კანზე 7 საათით მეტს ძლებს, ვიდრე გრიპის ვირუსი – კვლევა კორონავირუსი კანზე 7 საათით მეტს ძლებს, ვიდრე გრიპის ვირუსი – კვლევა – Batumelebi
RU | GE  

კორონავირუსი კანზე 7 საათით მეტს ძლებს, ვიდრე გრიპის ვირუსი – კვლევა

SARS-CoV-2 ადამიანის კანზე დაახლოებით 9 საათს ძლებს, რაც მნიშვნელოვნად აღემატება A ტიპის გრიპის ვირუსის (IAV) გამძლეობას კანზე, რომლის ხანგრძლივობაც დაახლოებით 2 საათამდეა.

„კანზე SARS-CoV-2-ის ხანგრძლივად დარჩენა ზრდის კონტაქტით გადაცემის რისკს; ამასთან, ხელის ჰიგიენამ შეიძლება საგრძნობლად შეამციროს ეს რისკი”, – ამის შესახებ კიოტოს პრეფექტურის სამედიცინო უნივერსიტეტში ჩატარებულ კვლევაში წერია, რომელიც 3 ოქტომბერს გამოქვეყნდა.

ადამიანის კანზე SARSCoV-2-ის სტაბილურობის დასადგენად მკვლევარებმა შეაფასეს სპეციალურ სითხეში და ასევე ზედა სასუნთქი გზების ლორწოში შერეული SARS-CoV-2 და A ტიპის გრიპის ვირუსის გამძლეობა ადამიანის კანის ზედაპირზე და თერმული დეზინფექციის ეფექტურობა.

  • „SARS-CoV-2 და A ტიპის გრიპის ვირუსი (IAV) უფრო სწრაფად კარგავენ ძალას კანის ზედაპირზე, ვიდრე სხვა ზედაპირებზე [უჟანგავ მეტალზე/მინაზე/პლასტმასზე];
  • SARS-CoV-2-ის სიცოცხლის ხანგრძლივობა მნიშვნელოვნად აღემატებოდა A ტიპის გრიპის ვირუსისას (IAV) [9.04 სთ და 1.48 სთ].
  • სხვა ზედაპირებზე A ტიპის გრიპის ვირუსმა ქმედუნარიანობა უფრო სწრაფად დაკარგა როცა ლორწოში იყო, ვიდრე სხვა გარემოებებში, მაშინ როცა SARS-CoV-2-მა მსგავსი სტაბილურობა აჩვენა როგორც ლორწოში, ისე სხვა მედიუმში;
  • SARS-CoV-2-ის სიცოცხლის ხანგრძლივობა  მნიშვნელოვნად აღემატებოდა A ტიპის გრიპის ვირუსის (IAV)-ის სიცოცხლის ხანგრძლივობას [11.09 სთ და  1.41 სთ)” – წერია კვლევაში.

რაც შეეხება პროფილაქტიკას, კვლევაში წერია, რომ ადამიანის კანზე მოხვედრილმა SARS-CoV-2-მა და A ტიპის გრიპის ვირუსმა ლორწოსა თუ სხვა სითხეში სრულად დაკარგეს ძალა 15 წამში ეთანოლის გამოყენების შედეგად. 

ადამიანის კანზე მოხვედრილი SARS-CoV-2-ის 9-საათიანი სიცოხლისუნარიანობა შეიძლება ზრდიდეს კონტაქტით გადაცემის რისკს IAV-თან შედარებით და ამდენად, აჩქარებდეს პანდემიას. SARS-CoV-2 ინფექციების გავრცელების პრევენციისთვის  მნიშვნელოვანია ხელის ჰიგიენის სათანადოდ დაცვა.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან