10 ოქტომბერი ფსიქიკური ჯანმრთელობის მსოფლიო დღეა. „იუნისეფის“ ინფორმაციით, ფსიქიკურ ჯანმრთელობაზე ქვეყნები თავიანთი ჯანდაცვის ბიუჯეტის მხოლოდ 2 პროცენტს ხარჯავენ, რაც საკმარისი არ არის.
„COVID-19-ით გამოწვეულ ფსიქოლოგიურ შედეგებს ოჯახები მომავალ წლებშიც იგრძნობენ. ფსიქიკურ ჯანმრთელობასა და ფსიქოსოციალურ სერვისებში ინვესტირება ასე მნიშვნელოვანი ჯერ არ ყოფილა“-ამბობს „იუნისეფი“.
მაგალითად საქართველოში, მთავრობის 2 მარტის დადგენილებით, სათემო ამბულატორიული ფსიქიატრიული სერვისის თვის ბიუჯეტი მიმწოდებლის მიხედვით, მთელი ქვეყნის მასშტაბით 599 590 ლარითაა განსაზღვრული.
აქედან, აჭარის ექვსივე მუნიციპალიტეტში, ბათუმის ჩათვლით, ფსიქიატრიული სერვისებისთვის თვეში 53 ათასი ლარია მხოლოდ გათვალისწინებული.
ფსიქიატრიული კრიზისული ინტერვენციის სერვისის თვის ბიუჯეტი კი მიმწოდებლების მიხედვით, 10 710 ლარით ფინანსდება აჭარაში. უმნიშვნელოდ გაზრდილია სხვა რეგიონებში, მაგალითად თბილისში, იმერეთსა და შიდა ქართლში.
მოზრდილთა ფსიქიატრიული სტაციონარული მომსახურების თვის ბიუჯეტი კი, აჭარაში 150 700 ლარითაა განსაზღვრული, უფრო დიდ რეგიონებში, მაგალითად თბილისში 387 800 ლარით.
რაც შეეხება კოვიდ-19-ით გამოწვეულ ფსიქოლოგიურ შედეგებს, ამ საკითხზე საქართველოში კვლევას აწარმოებს ფონდი „გლობალური ინიციატივა ფსიქიატრიაში – თბილისი“, რომლის შედეგებიც წლის ბოლოს იქნება ცნობილი.
___________________________
მთავარი ფოტო: „იუნისეფის“ ფეისბუკის გვერდიდან.
