ხელვაჩაურის მერს, ჯუმბერ ვარდმანიძეს ბოლო ქონებრივ დეკლარაციაშიც მითითებული აქვს, რომ ის კომერციული ფართობის მესაკუთრეა ბათუმში, ჭავჭავაძის ქუჩაზე. ჯუმბერ ვარდმანიძეს თავის დეკლარაციაში არსად აქვს ნახსენები ამ კომერციული ფართობიდან მიღებული შემოსავლის შესახებ, რაც კანონდარღვევაა.
კომერციული ფართობი, რომლის მესაკუთრეც ჯუმბერ ვარდმანიძეა, ჭავჭავაძის #6-ში მდებარეობს და 103,57 კვადრატული მეტრია. აქ „ბათუმელებს“ საკონდიტრო მაღაზია დახვდა. მაღაზიაში გვითხრეს, რომ ყოველთვიურად ქონების მესაკუთრეს 4500 ლარს უხდიან.
შესაბამისად, ხელვაჩაურის მერი ამ მაღაზიის გაქირავებიდან წელიწადში 54 ათას ლარს იღებს, თუმცა ამ შემოსავლის შესახებ ჯუმბერ ვარდმანიძის ქონებრივ დეკლარაციაში ვერაფერს ნახავთ.
ქონებრივ დეკლარაციაში ხელვაჩაურის მერი წერს, რომ მას ბათუმის ცენტრში, ჭავჭავაძის #6-ში კომერციული ფართობი აჩუქეს. საჯარო რეესტრის მონაცემებით კი, ჯუმბერ ვარდმანიძემ ეს ქონება 2009 წელს იყიდა.
„ეს კომერციული ფართობი არის ჩემი სიძის, ჩემი არაა, უბრალოდ სესხი რომ გამოეტანა ჩემი სახელფასოთი, მაშინ მე ჯერ კიდევ აკადემიაში ვმუშაობდი, იძულებული გახდა, რომ ჩემზე გადმოეფორმებია,“ – გვითხრა ხელვაჩაურის მერმა, ჯუმბერ ვარდმანიძემ. მას ვკითხეთ, რატომ არ არის ასახული დეკლარაციაში კომერციული ფართობის გაქირავებიდან მიღებული შემოსავალი.
ხელვაჩაურის მერის განმარტებით, კომერციული ფართობის გაქირავებით, რომლის მესაკუთრეც ოფიციალურად თავადაა, სარგებელს მისი დისშვილი და სიძე იღებენ.
„…შემოსავლებში არაა ასახული, რადგან მათ ანგარიშზეა, ჩემი სიძის და დისშვილის,“ – დასძინა ჯუმბერ ვარდმანიძემ.
ჯუმბერ ვარდმანიძე ხელვაჩაურის არჩეული მერია. ამას გარდა, იგი ბათუმის საზღვაო აკადემიის პროფესორად მუშაობს.
კომერციული ფართობი ბათუმში, ჭავჭავაძის ქუჩაზე. ამ ფართობის მოიჯარეები მესაკუთრეს ყოველთვიურად უხდიან 4 500 ლარს. ჯუმბერ ვარდმანიძე თავის ქონებრივ დეკლარაციაში წერს, რომ ეს ქონება მისი საკუთრებაა.
