დღეს, 25 სექტემბერს, დილით, პარიზის მეთერთმეტე რაიონში, სატირული გამოცემის, „შარლი ებდოს“ რედაქციის ყოფილ შენობასთან დანით შეიარაღებული პირი რამდენიმე ადამიანს დაესხა თავს. გამოცემა Le Parisien-ის ცნობით რამდენიმე ადამიანი მძიმედაა დაჭრილი. 2015 წელს ზუსტად ამავე ადგილზე დაესხნენ თავს „შარლი ებდოს“ კარიკატურისტებს.
საფრანგეთის პრეზიდენტმა, ემანუელ მაკრონმა, საგანგებო ბრიფინგი გამართა და განაცხადა, რომ სიტუაცია კონტროლის ქვეშაა.
პარიზში უსაფრთხოების მიზნით დაიკეტა შემთხვევის ადგილთან ახლომდებარე სკოლები და კოლეჯები. ხელისუფლების წარმომადგენლებმა მიმართერს მშობლებს, რომ მათი შვილები სასწავლო დაწესებულებების შენობებში უსაფრთხოდ არიან და დროებით ურჩევენ მათ, თავი შეიკავონ და შვილებს სკოლაში არ მიაკითხონ.
დღესვე ეჭვმიტანილი ბასტილიის მიმდებარე ტერიტორიაზე დააკავეს.
