დღეს, 21 სექტემბერს, საქართველოს ორ სკოლაში სწავლება საკლასო ოთახებში შეწყდა კორონავირუსის დადასტურებული და საეჭვო შემთხვევების გამო. ოზურგეთში, სოფელ შრომის საჯარო სკოლა დისტანციურ სწავლებაზე გადავიდა, ასევე, დისტანციურად გააგრძელეს სწავლება სენაკის მუნიციპალიტეტის სოფელ თეკლათის სკოლის მოსწავლეებმა.
სოფელ შრომაში ეჭვობენ, რომ კორონავირუსი აქვს პირველკლასელს.როგორც საჯარო სკოლის დირექტორმა, რუსუდან ცეცხლაძემ გვითხრა, მისი ინფორმაციით, ბავშვს ორჯერ აუღეს ტესტი კორონავირუსზე, მოსწავლე ახლა სახლშია და ჯერ ტესტის პასუხს ელოდებიან, მანამდე კი სკოლის 27 მოსწავლე და 12 მასწავლებელი დისტანციურად აგრძელებს სწავლას.
„ბავშვს სიცხე არ ჰქონდა, ყელი სტკიოდა და მშობელმა წაიყვანა ქობულეთში, რეფერალურში. მერე მოაკითხეს და ისევ აუღეს ტესტი, მოსთხოვეს გადაყვანა, მაგრამ არ გადაუყვანიათ და არის იზოლირებული, სახლში, ელოდებიან ტესტის პასუხს. მეტი არაფრის თქმა არ შემიძლია“, – გვითხრა სკოლის დირექტორმა.
სწავლება შეწყდა სენაკის სოფელ თეკლათის საჯარო სკოლაშიც. აქ ორ მოსწავლესა და სკოლის ერთ მასწავლებელს დაუდგინდა კორონავირუსი.
„დღეიდან გადავედით ონლაინსწავლებაზე. სკოლის მოსწავლეებმა და მასწავლებლებმა მიიღეს თვითიზოლაციის რეკომენდაცია, თვის ბოლომდე ასე იქნება ალბათ, მერვე დღეს ისევ გაგვიკეთებენ ტესტს. ბავშვები და ის პედაგოგიც კარგად გრძნობენ თავს, არ აქვთ სიცხე, კლინიკაში არიან გადაყვანილი“, – გვითხრა სკოლის დირექტორმა, მერაბ დარჯანიამ.
საქართველოში სკოლებსა და სასწავლებლებში სწავლის განახლება პირველი ოქტომბრიდან იგეგმება.
