დაავადებათა კონტროლის ცენტრის ხელმძღვანელის, ამირან გამყრელიძის განცხადებით, კორონავირუსის მსუბუქ შემთხვევებს საკარანტინო სივრცეების გარდა, ბინაზეც, პირველადი ჯანდაცვის ექიმების ჩართულობით უმკურნალებენ.
„დაიწყო თბილისში და განსაკუთრებით აჭარაში მსუბუქი შემთხვევების საკარანტინო სივრცეებში მართვა. ჯერ ჰოსპიტალში რამდენიმე დღე სრული გამოკვლევა და შემდეგ მე-3, მე-4 დღიდან საკარანტინო სივრცეში მართვა. ასევე აჭარაში მალე დაიწყება უკვე სახლში ანუ ბინაზე მართვა პირველადი ჯანდაცვის ექიმების მიერ, ეს ეხება მხოლოდ მსუბუქ შემთხვევებს“, – განაცხადა ამირამ გამყრელიძე „რუსთავი 2-თან“ ინტერვიუში.
პირველი სექტემბრიდან დღემდე აჭარაში კორონავირუსის ახალი შემთხვევების რაოდენობა ყოველდღიურად იზრდება.
ბოლო მონაცემებით, აჭარაში კორონავირუსზე მკურნალობს 414 პაციენტი, აქედან 285 – სამედიცინო დაწესებულებებში, 129 კი საკარანტინო სივრცეში იმყოფება მეთვალყურეობის ქვეშ, პაციენტებს იღებს ექვსი კლინიკა.
