ბათუმის ბულვარში რამდენიმე ადგილას ფიჭვის ხეებს ჭრიან. როგორც ბულვარის ადმინისტრაციაში „ბათუმელებს“ უთხრეს, ხეები გახმა და ზამთარში შესაძლოა წაიქცეს. ფიჭვის გარდა სხვადასხვა ლოკაციაზე მოიჭრება მაგნოლიის, ქაფურის და ცხემლის ხეებიც. სულ რვა ხე.
„გამხმარია 8 ხე, ზამთრისთვის ავარიული სიტუაცია რომ არ გამოიწვიოს, ამიტომ ვჭრით. აქტები შედგენილია, რომ ხეები გამხმარია“, – ამბობს „ბათუმის ბულვარის“ დირექტორი ირაკლი ჯინჭარაძე.
ირაკლი ჯინჭარაძე ამბობს, რომ წიწვოვან ხეებს ყოველ წელს აახლებენ, თუმცა დიდ ხეებს იშვიათად ჭრიან. „იგივე მცენარეებით ჩავანაცვლებთ, რაც მოიჭრება. სადაც ფიჭვნარია, ფიჭვნარი უნდა იყოს და სადაც არის პალმები, უნდა იყოს პალმა. ამჯერად ფიჭვებია დაზიანებული, დიდი ხეებია, მაგრამ ძველია“, – ამბობს ჯინჭარაძე.
თუმცა, ბულვარის ადმინისტრაციაში მოგვიანებით აზუსტებენ, რომ ფიჭვების გარდა, გამხმარია მაგნოლიის, ქაფურის და ცხემლის ხეებიც, რომელიც ასევე მოიჭრება.