Batumelebi | ბათუმში კორონავირუსის 80 ახალი შემთხვევიდან 22-ის ინფიცირების წყარო უცნობია ბათუმში კორონავირუსის 80 ახალი შემთხვევიდან 22-ის ინფიცირების წყარო უცნობია – Batumelebi
RU | GE  

ბათუმში კორონავირუსის 80 ახალი შემთხვევიდან 22-ის ინფიცირების წყარო უცნობია

აჭარის საზოგადოებრივი ჯანდაცვის ცენტრის დირექტორის, რუსუდან შავიშვილის განცხადებით, ბოლო 24 საათში აჭარაში გამოვლენილი 80 ახალი შემთხვევიდან 22 პირის ინფიცირების წყარო უცნობია.

„გასული დღე-ღამის განმავლობაში აჭარაში გახლავთ 80 დადასტურებული შემთხვევა და რამდენიმე შემთხვევა გახლავთ კვლევის ფაზაში, ანუ ჯერ არ არის ბოლომდე კვლევა დასრულებული, საეჭვო შემთხვევებია.

კორონავირუსით ინფიცირების 20-ზე მეტი შემთხვევა დაკავშირებულია რიტუალურ პროცესებთან, ანუ საქორწილო დარბაზებში ყოფნის ფაქტს უკავშირდება. 22 გახლავთ უცნობი, შემთხვევა, ანუ პირველ წყარო არ ჩანს ჯერჯერობით. 7 არის სამედიცინო დაწესებულებთან დაკავშირებული შემთხვევა, სამი გახლავთ ხოფის სავაჭრო ცენტრთან დაკავშირებული, მათ შორის არის თანამშრომელი და მისი ოჯახის წევრები. ასევე პატარ-პატარა კერძო, მცირე ბიზნესის წარმომადგენლები, სადაც არ არის ორზე და სამზე მეტი პირი დასაქმებული,“ – თქვა რუსუდან შავიშვილმა.

მანვე დაადასტურა ინფორმაცია იმის შესახებ, რომ კორონავირუსი დაუდასტურდა აჭარის მთავრობის ადმინისტრაციის თანამშრომელს.

„მთავრობის ადმინისტრაციაში დადასტურდა კორონავირუსის შემთხვევა. ყველა კონტაქტირებული პირი გადაყვანილია იზოლაციაში. კოვიდინფიცირებული არის ჰოსპიტალიზებული. ვისთანაც ჰქონდა მას კონტაქტი, ყველას PCR ტესტი ჩაუტარდა და ყველას პასუხი არის უაყოფითი,“ – განაცხადა რუსუდან შავიშვილმა.

აჭარის საზოგადოებრივი ჯანდაცვის ცენტრის დირექტორის ინფორმაციით, გასული დღე-ღამის განმავლობაში დაახლოებით 2697 ტესტის კვლევა დასრულდა. კარვებიდან და პოლიკლინიკებიდან კი 2185 ტესტი იყო დასრულებული.

დღეიდან ბათუმის ბულვარში განთავსებული კარვები წყვეტენ ფუნქციონირებას. კარვები დარჩება მხოლოდ ხოფის ბაზრობის და ავტოსადგურის მიმდებარე ტერიტორიაზე.

კორონავირუსის 80 ახალი შემთხვევა ბათუმში – 24 საათის მონაცემები

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com