საქართველოში ბოლო ორი კვირის განმავლობაში ავადობის მაჩვენებლები შეიცვალა. ეს ნიშნავს, რომ ვირუსის ინციდენტობის მაჩვენებელი გაზრდილია – ამის შესახებ დაავადებათა კონტროლის ცენტრის დირექტორმა, მარინა ეზუგბაიამ დღევანდელ ბრიფინგზე ისაუბრა.
მისი განმარტებით ავადობის მაჩვენებელი 100 000 მოსახლეზე ქვეყანაში რვას აღწევს:
„მართალია, ამ მაჩვენებლით ჯერჯერობით ქვეყანა რჩება მწვანე ზონაში, იმიტომ, რომ ათზე ნაკლებია ინციდენტობა, მაგრამ ახალი 45 დადასტურებული შემთხვევა ქვეყანაში ეპიდემიის პერიოდში პირველად დადასტურდა. აქედან გამომდინარე, შეიძლება ვიფიქროთ, რომ დაავადებამ მიიღო უფრო ინტენსიური გავრცელება. ჩვენი კონტროლირებადი მატება ეჭვის ქვეშ დგება“, – განაცხადა ეზუგბაიამ.
რაც შეეხება ვირუსის გავრცელების მეორე ტალღას, ეზუგბაიას თქმით, „მეორე ტალღაზე შეგვიძლია ვისაუბროთ მაშინ, როდესაც დაიწყება ახალი რესპირატორული დაავადებების სეზონი, რომელიც უკავშირდება ოქტომბრის ბოლოს და ნოემბრის შუა რიცხვებს. ამას დაემატება გრიპი და სხვა ვირუსული ინფექციები, რომელიც ალბათ გააძლიერებს და გაართულებს ვითარებას. მეორე ტალღაზე საუბარია ამ პერიოდში ჯერჯერობით ვსაუბრობთ იმაზე, რომ მატებასთან გვაქვს საქმე.“
დღესვე მარინა ეზუგბაიამ კორონავირუსის გავრცელებასთან დაკავშირებით განსაკუთრებული ყურადღება გაამახვილა აჭარაზე. მან თქვა, რომ აჭარაში მდგომარეობა სერიოზულია: „ინციდენტობის მაჩვენებელი 42.4-ია. ეს ნიშნავს, რომ აჭარა წითელი ზონაა“. თუმცა მისივე ინფორმაციით ჯერჯერობით აჭარის ჩაკეტვაზე საუბარი არ არის.