„აჭარაში აგვისტო-სექტემბერში 156 დადებითი შემთხვევა გვაქვს, აქედან 40 უკავშირდება საკონდიტრო მაღაზია „დონას“ კლასტერს, 30 – ქობულეთს და ერთი ჩაქვის „ოაზისს“. დღევანდელი დღით დაძაბულ და ცხელ წერტილად რჩება აჭარა,“ – აღნიშნა მთავრობის საკოორდინაციო საბჭოს ბრიფინგზე დაავადებათა კონტროლის ეროვნული ცენტრის დირექტორმა, ამირან გამყრელიძემ.
ამირან გამყრელიძის ინფორმაციით, სტატისტიკა მზარდია, თუმცა ქვეყანა მწვანე ზონად რჩება.
„ინციდენტობის მაჩვენებლებით, რაც ნიშნავს 100 ათას კაცზე დაავადებულთა რაოდენობას, ივლისის პირველ კვირაში ჩვენ გვქონდა 0.7, აგვისტოს პირველ კვირაში – 1.2, სექტემბრის პირველ კვირაში – 5.3 ტენდენცია ზრდისა არის, მაგრამ ჩვენ სამფეროვანი შუქნიშნის მიხედვით, ვართ, რა თქმა უნდა, მწვანე ზონა…. ყვითელი ზონა არის მაშინ, როცა 100 ათასზე არის 10-დან 30-მდე შემთხვევა. ეს არ ნიშნავს იმას, რომ თვითდამშვიდებული ვიყოთ, ეს პროგნოზირებადი იყო,“ – აღნიშნა ამირან გამყრელიძემ.
დაავადებათა კონტროლის ცენტრის დირექტორმა მოსახლეობას მოუწოდა, მასობრივი შეკრებებისგან თავი შეიკავონ.
„ქორწილები კარგია, მაგრამ არ შეიძლება 300 და 400-კაციანი ქორწილი,“ – დასძინა ამირან გამყრელიძემ.
დღეს, 7 სექტემბერს, ქვეყნის მასშტაბით კორონავისურით დაინფიცირების 34 ახალი შემთხვევაში დაფიქსირდა, მათ შორის, 20 ბათუმში.
