ხულოს ბიბლიოთეკაში გაეროს მოსახლეობის ფონდმა „თანასწორობის კუთხე“ მოაწყო, სადაც ადამიანებს მხატვრული ლიტერატურის კითხვა შეეძლებათ, დისკუსიის გამართვა და თანასწორობის შესახებ ცნობიერების ამაღლება. კუთხე ეროვნული ბიბლიოთეკის დირექტორმა, გიორგი კეკელიძემ გახსნა. დღეს, 5 სექტემბერს, გაეროს მოსახლეობის ფონდის (UNFPA) საქართველოს ოფისმა, საქართველოს პარლამენტის ეროვნული ბიბლიოთეკასთან, ხულოს მერიასთან და საკრებულოსთან, ასევე კომპანია „სილქნეტთან“ თანამშრომლობით დაბა ხულოში რამდენიმე ღონისძიება გამართა.
გენდერული თანასწორობის იდეასა და მნიშვნელობაზე გიორგი კეკელიძემ საჯარო ლექცია წაიკითხა. „თანასწორობის კუთხეში“ ექნებათ კომპიუტერიც, „რაც ხულოში მცხოვრებ ახალგაზრდებს საშუალებას მისცემს იქონიონ მუდმივი წვდომა მათთვის საჭირო ინფორმაციაზე,“ – აღნიშნულია გაეროს მოსახლეობის ფონდის მიერ გავრცელებულ ინფორმაციაში.
დღესვე ხულოს ცენტრალურ მოედანზე ფოტოგრაფ დინა ოგანოვას ფოტოგამოფენა – „გოგონები მომავლიდან“ გაიხსნა. ფოტოპროექტი საქართველოს სხვადასხვა ქალაქსა და სოფელში მცხოვრები 10-დან 16 წლამდე გოგონების ისტორიებს გვიამბობს როგორც ფოტოების, ასევე ტექსტების მეშვეობით. პროექტის ავტორების აზრით, ღონისძიების მიზანი იმის ხაზგასმაა, რომ გოგონების პოტენციალს სრული რეალიზება სჭირდება და მათთვის თანაბარი, თანასწორუფლებიანი გარემოს შექმნა.
„…თითოეულ გოგონას უნდა მიეცეს საშუალება, დაასრულოს განათლება და მიიღოს ინფორმირებული გადაწყვეტილება საკუთარი ცხოვრებისა და ჯანმრთელობის შესახებ,“ – მიიჩნევენ პროექტის ავტორები.
შეხვედრა ხულოში
