Batumelebi | 213-დღიანი შიმშილობის შემდეგ თურქეთში ადვოკატი პატიმრობიდან გაათავისუფლეს 213-დღიანი შიმშილობის შემდეგ თურქეთში ადვოკატი პატიმრობიდან გაათავისუფლეს – Batumelebi
RU | GE  

213-დღიანი შიმშილობის შემდეგ თურქეთში ადვოკატი პატიმრობიდან გაათავისუფლეს

გუშინ, 3 სექტემბერს, თურქეთში პატიმრობიდან გაათავისუფლეს სახალხო იურისტთა ბიუროს (HHB) ადვოკატი აითაჩ იუნსალი, რომელმაც სამართლიანი სასამართლოს მოთხოვნით 213 დღე შიმშილობაში გაატარა.

გამოცემა Bianet-ის ცნობით, ის ამ დროს სტამბოლის სულთან სულეიმანის სახელობის ჰოსპიტალში იმყოფებოდა. ტვიტერის ოფიციალურ გვერდზე სახალხო იურისტთა ბიურომ გამოაქვეყნა ვიდეო, სადაც აითაჩი საავადმყოფოდან გამოყვანისას კომენტარს აკეთებს:

“ეს თქვენი, ყველას სიყვარულითა და ძალისხმევით მოხდა, იმიტომ მოხდა, რომ თქვენ ამაზე პრეტენზია გქონდათ. ძალიან მიყვარხართ, ჩვენ გავიმარჯვებთ”.

 

 

აითაჩ იუნსალის გათავისუფლების გადაწყვეტილება უმაღლესი სასამართლოს მე-16 პალატამ მიიღო, მისი ჯანმრთელობის მდგომარეობა საპატიმროში დარჩენასთან შეუთავსებლად ცნეს. სასამართლომ იუნსალს შეუჩერა პატიმრობის ვადები:

“დადგინდა, რომ სასჯელის აღსრულება უნდა შეჩერდეს მანამ, სანამ მოპასუხე მხარე არ გამოჯანმრთელდება. ასევე უნდა იყოს უზრუნველყოფილი მოპასუხის დაუყონებლივ გათავისუფლება, თუ იგი არ იქნება დამნაშავედ მიჩნეული სხვა ბრალდების გამო“, – მიმართა სასამართლომ პროკურატურას.

აითაჩ იუნსალი / წყარო Facebook

დღეს თურქეთის დროით 14:30-ზე სახალხო იურისტთა ბიურომ, აითაჩ იუნსალის გულშემატკივრებმა და რიგმა პოლიტიკოსებმა საჯარო განცხადებები გაავრცელეს, მათ შორის ითქვა, რომ იუნსალმა შეწყვიტა შიმშილობა, ის დამოუკიდებელ ექიმებთან იმკურნალებს და გააგრძელებს ბრძოლას.

ერთი კვირის წინ საპროტესტო შიმშილობის 238-ე დღეს გარდაიცვალა აითაჩ იუნსალის კოლეგა, ასევე ადვოკატი სახალხო იურისტთა ბიუროდან, ებრუ თიმთიქი, რომელიც ასევე პატიმრობაში იმყოფებოდა.

გამოძიება მას და სხვა იურისტებს, ჯამში, 20-მდე ადამიანს, ტერორიზმთან კავშირს ედავებოდა, რასაც გამორიცხავდნენ როგორც მსჯავრდებულები, ისე მათი კოლეგები. ისინი აღნიშნავდნენ, რომ განაჩენი სასამართლომ ყალბ მტკიცებულებებზე დაყრდნობით გამოიტანა.

ამ თემაზე ასევე გირჩევთ წაიკითხოთ:

დაიღუპა თურქი ადვოკატი, რომელიც 238 დღე შიმშილობდა

წერილი მომაკვდინებელი შიმშილობიდან – „მინდოდა, შენთვის საკუთარი თავი გამეცნო“

ნეტგაზეთის მასალების სხვა გამოცემებში გადაბეჭდვის წესი
ავტორი