ნეტგაზეთი • RU

პენსიონერები პენსიას ყოველი თვის პირველიდან 14 რიცხვამდე მიიღებენ

პენსიონერები კუთვნილი პენსიის მიღებას ყოველი თვის პირველი რიცხვიდან 14 რიცხვამდე შეძლებენ – ამის შესახებ დღეს, 27 აგვისტოს, საქართველოს პრემიერ-მინისტრმა, გიორგი გახარიამ განაცხადა მთავრობის კანცელარიაში.

„მოგეხსენებათ, პენსიები ჩვენს პენსიონერებს ერიცხებათ ყოველი თვის 14 რიცხვში და ეს ლიბერთი ბანკის ფილიალებში მუდმივად რიგების, დისკომფორტის საბაბი იყო. პანდემიის პირობებში ეს არის მაღალი რისკის მატარებელი ეპიდემიის გარცელებისთვის. ყველამ ვიცით, რომ მოხუცები არიან მაღალი რისკის ჯგუფში, ამიტომ ჩვენ საბანკო სექტორთან ერთად მივიღეთ გადაწყვეტილება, რომ პენსიების დარიცხვა და შესაბამისად, გაცემა დაიწყება ყოველი თვის პირველი რიცხვიდან 14 რიცხვამდე, შესაბამისი განრიგის მიხედვით. ყველა პენსიონერს ეცოდინება თავისი განრიგი, ამას უზრუნველყოფს ბანკი, არანაირი ტექნიკური შეფერხება და პრობლემა არ იქნება და ვერ იქნება“, – განაცხადა გახარიამ.

მისი თქმით, აღნიშნული გადაწყვეტილების შედეგი უნდა იყოს რიგების შემცირება და, შესაბამისად, კორონავირუსის რისკგუფში მყოფი პენსიონერების დაცვა.

„ჩვენს პენსიონერებს უნდა ჰქონდეთ შესაძლებლობა არა ერთ დღეს, მთელი საქართველოს მასშტაბით მიიღონ პენსია, არამედ პირველი რიცხვიდან 14 რიცხვამდე, ეპიდემიოლოგების რჩევების გათვალისწინებით, რომ არ მოხდეს გავრცელება განსაკუთრებით მაღალი რისკის შემცველ პენსიონერებში“, – განაცხადა გიორგი გახარიამ.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com