Batumelebi | ბათუმის მერია მიწას ყიდის, მყიდველს კი ამ ნაკვეთთან ქუჩის მოწყობას ჰპირდება ბათუმის მერია მიწას ყიდის, მყიდველს კი ამ ნაკვეთთან ქუჩის მოწყობას ჰპირდება – Batumelebi
RU | GE  

ბათუმის მერია მიწას ყიდის, მყიდველს კი ამ ნაკვეთთან ქუჩის მოწყობას ჰპირდება

ბათუმის მერია გმირთა ხეივნის მიმდებარედ, ყოფილი მანქანათმშენებელი ქარხნის ადგილას 5 958 კვ.მ. ტერიტორიას პირობიანი აუქციონით ყიდის. მიწის ნაკვეთის საწყისი ფასი 6 მილიონ 559 000 ლარია, ბიჯი  -100 000 ლარი.

საპრივატიზებო პირობაში მერია წერს, რომ გვერდით მიწის ნაკვეთზე, რომელიც მუნიციპალიტეტის საკუთრებაშია, მერია ქუჩას მოაწყობს, რომელიც მომიჯნავე ოძელაშვილის ქუჩას მიუერთდება.

მერიის ინფორმაციით, ქუჩის მოწყობას ხელს უშლის ოძელაშვილის ქუჩაზე №4-ში მდებარე ერთსართულიანი სახლი [113,27 კვ.მ.]. სწორედ ამ შენობის გამოსყიდვას სთხოვს მერია აუქციონზე გამოტანილი ნაკვეთის პოტენციურ მყიდველს [სავარაუდოდ ქუჩის მოწყობის სანაცვლოდ].

აუქციონში გამარჯვებული ვალდებულია, ხელშეკრულების გაფორმებიდან 6 თვეში მესაკუთრესთან უშუალო შეთანხმებით და საკუთარი ხარჯებით გამოისყიდოს ეს სახლი, მოახდინოს მისი დემონტაჟი, თავისუფალი მიწის ნაკვეთი კი ბათუმის მუნიციპალიტეტს უსასყიდლოდ გადასცეს საკუთრებაში და საჯარო რეესტრშიც დაურეგისტრიროს.

აუქციონი 8 სექტემბერს უნდა დასრულდეს.

მთავარი ფოტო: მერია ქუჩის მოწყობას წითლად მოხაზულ ტერიტორიაზე გეგმავს, ხოლო მწვანედ მონიშნული ნაკვეთი მერიამ აუქციონზე გამოიტანა.

ნეტგაზეთის მასალების სხვა გამოცემებში გადაბეჭდვის წესი
ავტორი