„ერთიანი ნაციონალური მოძრაობა“ კანდიდატებზე ჯერ ღიად არ საუბრობს. „უახლოეს მომავალში პრეზენტაციას ვგეგმავთ და იქ გავაჟღერებთ ინფორმაციას“, – გვითხრა გიორგი კირთაძემ, პარტიის ბათუმის ორგანიზაციის ხელმძღვანელმა. ზუსტად როდის გეგმავს პარტია პრეზენტაციას ბათუმში, ჯერ არ ვიცით, თუმცა მაჟორიტარი კანდიდატების ვინაობის შესახებ „ბათუმელებისთვის“ უკვე ცნობილია. მათ შორის არც ერთი არ არის ქალი.
ჩვენი ინფორმაციით, პარტიის ბათუმის მაჟორიტარობის კანდიდატი აჭარის უმაღლეს საბჭოში გიორგი კირთაძე იქნება, სახელისუფლებო პარტიიდან მისი კონკურენტი სოფლის მეურნეობის მოქმედი მინისტრი ტიტე აროშიძეა. მას ჯერ თანამდებობა არ დაუტოვებია.
გიორგი კირთაძე ბათუმის საკრებულოს თავმჯდომარე იყო 2010 -2013 წლებში.
რაც შეეხება საპარლამენტო კანდიდატს, პარტია ბათუმის მაჟორიტარობის კანდიდატად უმაღლეს საკანონმდებლო ორგანოში ლევან ვარშალომიძეს განიხილავს, თუმცა ეს საკითხი ჯერ გადაწყვეტილი არ არის. იმ შემთხვევაში, თუ მას კანდიდატად დაასახელებენ, მისი მთავარი კონკურენტი „ოცნებიდან“ რესან კონცელიძე იქნება.
ქობულეთში „ერთიანი ნაციონალური მოძრაობა“ მაჟორიტარობის კანდიდატად ბონდო თედორაძეს დაასახლებს, ის ქობულეთის ამ მოწვევის საკრებულოს წევრია. „ოცნებიდან“ მისი კონკურენტი უმაღლესი საბჭოს წევრი, ადამიანის უფლებების კომისიის მოქმედი თავმჯდომარე ცოტნე ანანიძეა.
ქობულეთის მაჟორიტარობის კანდიდატად პარლამენტში კი ელგუჯა ბაგრატიონს დაასახელებენ, ის უმაღლესი საბჭოს ოპოზიციური ფრაქციის თავმჯდომარეა. სახელისუფლებო გუნდიდან მისი კონკურენტი აჭარის ყოფილი ჯანდაცვის მინისტრი ზაალ მიქელაძე იქნება.
ხელვაჩაურში, შუახევში, ქედასა და ხულოში „ერთიანი ნაციონალური მოძრაობის“ სახელით აჭარის უმაღლესი საბჭოს წევრი გია აბულაძე იბრძოლებს. „ოცნებიდან“ მას შუახევის მუნიციპალიტეტის მოქმედი მერი ფრიდონ ფუტკარაძე დაუპირისპირდება.
ამ ოლქის საპარლამენტო კანდიდატი კი მიშა ბოლქვაძე იქნება, ის ხელვაჩაურის ამ მოწვევის საკრებულოს წევრია. „ოცნებიდან“ ამ საარჩევნო ოლქის კანდიდატი მოქმედი პარლამენტარი ანზორ ბოლქვაძეა.
